Nagtakoban nga pagbati

Gula 6

Wala makasabot si Denia sa nahimo niyang reaksiyon dihang nakita niya si James. Mitutok kini kaniya apan ingon sa dili maabiabihon ang panagway niini. Gibati niya ang tumang kabakikaw sa kaugalingon.

Sa dihang hingpit na siyang nakasulod sa lawak, gilig-on niya ang iyang kaugalingon. Tinuod man usab nga may talagsaon siyang kalig-on sa balatian. Matud pa sa iyang magtutudlo kaniadto sa hayiskol. Spirited siya nga pagka-babaye kursonada ug mapangahason. Gani, kun nahatagan lang siya’g kahigayonan nga makapadayon pagtungha sa kolehiyo kursong criminology unta ang iyang kuhaon tungod kay gusto siyang mahimong police woman.

Mao nga sa sitwasyon karon, dili siya angay mahadlok kang James. Ang iyang hunahuna nagsulti kaniya nga wala siya’y angay kahadlokan. Giisip usab niyang agalon si James tungod kay anak man kini sa mga agalon niyang magtiayon ug ania siya aron pag-alagad niini.

“G-good evening,” may kataha nga miubay sa pagpangatahoran ni Denia.

“Ipahimutang lang ang mga pagkaon sa ibabaw sa lamesa,” wala tubaga sa lalaki ang iyang pagpangatahoran.” Ipatawag ko lang unya ikaw kun mahuman na ko’g kaon.”

Gituman ni Denia ang gisulti sa lalaki sa sinultihan niini, iyang nasabot nga gusto niining mogawas una siya sa lawak samtang magkaon kini. Nananghid dayon siya human ikapahimutang ang mga pagkaon ni James sa lamesa.

“Kadiyot lang...” -- Sumpayan pa