Kahulogan sa damgo

Usa ka buntag niana naghingasoy si Fred sa iyang damgo sa milabay’ng gabii....“Haskang ngilngiga sa akong damgo ka gabii, Gaw Rael...” “Kay unsa man diay imong damgo, Gaw?” “Puwerte kuno nakong itsar sa akong hugaw didto sa CR.”

“Unsa mang kahimtanga, bi?”

“Sus, pwerte gyung daghana, Gaw. Basta kay napuno lagi ang enedoro unya naa pay nagkatag sa salog nga tiles.”

“Unsa pa, Gaw?”

“Grabeha lagi, Gaw El. Bisan giunsa nako’g bubo og pipila ka baldeng tubig, wa gyud malimpiyo. Naluya na lang gud ko.”

“Tsk-tsk-tsk...”

“Unsa may buot ipasabot adtong damguha, Gaw?”

“Abi nimo, Gaw, matud pa sa tinuohan sa kakaraanan, basta magdamgo kuno tag hugaw sa tawo, ang kahulogan kuno ana, kuwarta. May kuwarta kunong moabot nimo, Gaw Fred.”

“Mao ba?”

“O lagi.”

“Sige, Gaw El...ugma mopusta ko’s lotto.”

Pagkasunod adlaw...

“Ug sa dili pa kita mopadayon sa atong tulomanon...” nagkanayon ang announcer sa DyFM nga si Reymolito Delgado. “Ato unang ipadangat kining resulta sa lotto... sa 6/45 draw...”

“Kini da,” mahinamon si Fred nga nagpaabot sa resulta kay mipusta ra ba siya tungod sa iyang pagdamgo og hugaw sa tawo.

“Ania ang resulta...” mipadayon ang announcer.” 08-11-07-40-38-03.”

“Yehe! Yehhh!!! Naka-jackpot ko! Naka-jackpot kooo!!!”

Daghan na kaayo’g giplano si Fred. Magpalit siya’g mga multicab nga iyang papasaheroan sa iyang mga amigong drayber nga sila si Segundo, Melchor, Javier, Oliver, Bartolome, Fredrick ug Carmelo. Unya magtukod siya og imprintahan nga iyang nganlan og Fredmon Printing Press aron nga kadtong mga kapunongan sa mga magsusulat nga adunay proyekto sama pananglit kun mag-ugba og mga antolohiya o unsa pa dihang mga patikunon anha na unya modangop sa iyang imprintahan kay dili man niya pangayoan og dako. Mao kini iyang pangandoy isip usa usab ka magsusulat.

Apan dihay lain niyang gilaraw nga nakapatilagak sa iyang laway. Sa kataposan iya na gyud unyang maangkon ang pagkababaye ni Lusing nga bisan naminyo na kang Mariano nga taga Kalawisan sa dakbayan sa Lapulapu wa lang gihapon niya hikalimti. Naunhan man gud siya ni Mariano tungod kay hilabihan man nga taslakana og babaye kini si Fred! Sa iyang hunahuna, di niya igsapayan bisag tuwakhang na si Lusing basta matilawan lang gyud niya ang iyang ideal woman. Naseguro niyang di kabalibad si Lusing kun iya na unya kining hagdon gumikan kay nagkalisudlisod sab ang pagkabutang nila ni Lusing ug Mariano. Napanglantawan ni Fred nga mokangkang gyud ang mga kamot ni Lusing kun iya nang dudhoan og mga papel de banko.

Nahiuli na si Fred gikan nga mikobra sa iyang daog sa kaulohan. Giadto niya si Lusing sa panimalay niini dihang iyang nasayran nga wala diha si Mariano kay naghatod og sinulat sa Banat News.

Apan sa dihang nagkombate na sila si Fred ug Lusing sa katre kalit nga nahiabot si Mariano nga nagbitbit og kutsilyo. Giluglog ni Mariano ang liog ni Fred....

“Ahh...aahhh...aaahhhh...”

“Hoy! Pagmata, Gaw!” giyogyog og maayo ni Israel si Fred nga giurom.

“H-ha???” ni Fred pa nga mitimbakuwas sa gihigdaan nilang karton. “Pastilan, Gaw Israel. Nakadaog na unta ko’s lotto pero damgo lang diay gihapon!”

“Ay, da...tuo ka ma’g damgo, Gaw Fred. Mangatulog ta’g balik kay sayo ra ba tang magmasa’g semento ugma!

Pagkaugma sa buntag, pag-break time nila ni Fred ug Israel sa ilang gitrabahoang construction, nangadto sila sa labing duol nga tindahan aron mangisnaks. Unya gisil-ip ni Fred ang resulta sa 6/45 lotto draw nga nahipatik sa Banat News nga gidisplay sa gawas sa tindahan “09-41-37-18-01-45.”

“Ngek!” nakatuaw si Fred dayong lingi ngadtong Israel. “Bida, Gaw...wa gyuy nisakay sa akong gipustahan nga nigawas sa akong damgo!” (Kataposan)