Miapil Na Lang

Pastilan kanimo, Binog! Undangi na kanang pagpunay mo’g lala nianang bino kay basi’g mao ra unya kanay imong kamatyan!” Singgaak ni Nang Mayling ngadto sa iyang bana dihang nakita niya kining naggunit na usab og baso nga puno sa bino.

“Pasagdi lang god ko, Ling! Nasayod ka bitaw nga mao ra kini ang akong lingaw. Hay labig mokuyog ko ni Pare Isko sa sugalan o kang Pare Teban ba hinuon ngadto sa kabarit. Humot ra ba kaayo nga mga tsiks didto!” Pasiaw nga tubag ni Noy Binog.

“Aw, na hala... inom na lang diha’g maayo tuntoha ka!” Singgaak na usab ni Nang Mayling nga gisundan sa pagkusmod sa iyang simod.

Dili gyod makapugong sa iyang bana si Nang Mayling. Nahadlok man sab god siya nga tinud-on unya ni Noy Binog ang bahad niini nga moadto sa sugalan ug kabarit kung pugson siya sa pagbiya ning iyang paghuboghubog. Gibuhat na ni Nang Mayling ang tanang paagi apan nagpabiling gahi ang ulo sa iyang bana. Ug mao kini karon ang dakong problema nga gipas-an ni Nang Mayling.

Daghang higayon na nga nahilandig sa ospital si Noy Binog tungod sa bino. Naagian na usab niya ang daghang sakit sama sa sakit sa baga, sakit sa atay, sakit sa pantog ug uban pa. Nakaagi na usab siya og sakit sa tinai sama sa “ulcer”! Dili na maihap ang mga tambag sa nagkalainlaing mga mananambal nga paundangon siya sa pag-inom nianang bino apan gibalewala lamang kini ni Noy Binog. Ug matod pa ni Noy Binog kang Nang Mayling, moinom man siya’g bino o dili, mamatay lang gihapon siya busa mas maayo pag-moinom siya niini kay mamatay pa siyang malipayon.

Usa ka adlaw niana, sayo nga nahiuli si Noy Binog gikan sa kompaniya nga iyang gitrabahoan. Paghimuntog gyod sa iyang mga tiil sa sala, midiretso dayon siya sa kusina ug gidumdom ang nahimutangan sa refrigerator aron kuhaon ang paborito niyang bino. Gibutang niya kini sa sulod sa refrigerator kaganina aron bugnaw na kini sa iyang pagpauli. Mas nindot man god dimdimon ang bugnaw nga bino. Miiknat ang iyang kilay ug kalit nga mihubas ang mitubod niyang laway dihang naabli na ang refrigerator. Nakita niya nga wala na sa gibutangan niini ang paborito niyang bino. Gisera dayon niya kini pagbalik ug kusog nga milakang paingon sa lawak nila ni Nang Mayling. Apan wala didto sa lawak si Nang Mayling busa migawas siya sa balay ug gipangita didto ang iyang asawa.

Paglipot niya sa luyo sa ilang pinuy-anan nakita dayon niya si Nang Mayling. Naghigda kini sa duyan nga nahimutang sa ilawom sa kahoy’ng talisay. Nagpiyong ang mga mata ni Nang Mayling samtang naghigda sa duyan ug nawalis ang gisul-ob niyang sayal.

“Nia ka ra man diay dinhing bayhana ka!” Banghag ni Noy Binog kinsa midalig bira sa nawalis nga sayal sa asawa ug gitabonan ang midaylang niining bugan. “Hain na man ang bino, ha! Hain???”

Naigpot si Nang Mayling ug daling miambak gikan sa duyan. Diriyot kini masukamod. Unya milakaw si Nang Mayling paingon sa ilang balay nga nagbaragbarag ug daw wala makakita kang Noy Binog hangtod nga nabangga kini sa bungbong ug nalimbuwad.

Nakapangawot si Noy Binog sa iyang ulo samtang nagtan-aw kang Nang Mayling nga naninguhang makabarog. Unya nanghupaw siya ug milingolingo dihang nasiplatan niya sa ibabaw sa duyan ang gipangita niyang bino nga basiyo na lang ang nahibilin. Ug nahinumduman ni Noy Binog ang gibahad ni Nang Mayling nga kung dili gyod siya moundang sa pag-inom nianang bino moapil na lang sab siya sa paghuboghubog. (Kataposan)