Room for rent

Gula 54

Gisangpit ko ni Albert pero wala ko na siya paminawa. Milahos na ko’g gawas sa iyang lawak. Midiretso ko sa lawak namo ni Denver. Sa nakasulod na ko, gi-lock nako’g seguro ang pultahan. Unya mihigda ko sa kama. Wala ko kapugngi ang paghilak.

Mihilak ko tungod sa kalagot nga akong gibati sa akong kaugalingon. Naglagot ko kay dili man gyud ko makahimo sa pagpakigbatok sa tental sa kahuyang. Wala ko masuko kang Albert sa iyang gibuhat nako. Nalipay ko sa nahitabo namo. Pero nakonsensiya ko kay lain na usab kining kasal-anan nga akong nahimo sa kaminyoon namo ni Denver.

“Hungog ka, Phoebe! Hungog ka!” Daw sa madungog nako ang sudya ug pagpanghimaraot sa akong tanlag kanako.

Bisan unsaon nako’g imagine, ingon sa dili katuohan nga may nahitabo na tali namo ni Albert. Mora’g paspas ra kaayo ang dagan sa mga panghitabo. Wala ko magdahom nga ang akong tinguha nga makatabang aron mahuwasan si Albert sa iyang takig ug hilanat tungod sa iyang pagkabasa sa ulan kaganinang adlawan maoy maggahas og dalan aron mahitabo ang talagsaon namong seksuwal nga panagtagbo!

Nakapanglingo ko samtang namalandong sa nahitabo namo ni Albert dili pa lang dugay. Nagkalawom na ang gabii apan mao gihapon kini akong gihunahuna. Unya naigking ko dihang may nanuktok sa pultahan sa lawak. Ang pagtuktok giubanan sa pagsangpit sa akong ngalan. Nasuta ko nga si Denver na ang nahiabot kay tingog man niya ang akong nadungog.

Mibangon ko ug giablihan ang pultahan. Gipasiga ko ang suga sa kuwarto dihang misulod na si Denver. Gi-lock nako ang pultahan sa kuwarto samtang si Denver mitangtang sa iyang sapatos, karsones ug polo.

“Nahikatulog ka na ba?” Gipangutana ko ni Denver samtang gisul-ob niya ang paborito niyang pajama nga pangkatulog.

“Wa pa,” mubo kong tubag. “Nagpaabot ko nimo.”

Wala motingog si Denver.

“Kinsa may nag-abli nimo sa silong?” Nangutana ko.

“Si Mrs. Rambaud,” tubag ni Denver. “Tayming sab nga nagkakuyog mi si Sir Mateo gikan sa eskinita paingon dinhi. Gikan pa siyang nag-duty. Siya na lay namukaw sa iyang asawa aron maoy moabli sa pultahan alang namo.”

Wala ko motingog. Gibati ko ang kasubo. -- Sumpayan pa