Dihang nagtungha pa si Eric sa grade five sayo kaayo siya kasulay og uyab-uyab, puppy love matud pa nila. Pila pa lang ka semana sa pagsugod sa klase kaniadto, usa ka hapon niana...
“Naa lagi sulat sa akong lamisa,” sa huna-huna pa ni Eric nga nahibulong ug tuod iyang gibasa.
“Hala....naa daw na crush nako,” ni Eric pa nga gibati na og kaanyag. Tungod sad sa kalinghod niya kaniadto mingbaga ang atay niya sa kuryosidad nga may naibog sa iyaha.
Nagsukit-sukit si Eric ngadto sa iyang mga klasmet hangtod nailhan niya ang nagpadala sa maong suwat. Si Peach nga nasulagma nga iyang crush. Inubanan pud sa sungog sa ilang mga klasmet naumol ang pagbati gani walay nahitabong pagpanguyab nagka M.U. o Mutual Understanding ang duha.
Sugod niadto kanunay si Eric ug Peach magpasiplatay, gani kada hapon silang magduwa ilabi na’g ang ampay ni Eric ang dakop-dakop. Tuyoon man gud sa iyang mga klasmet nga siya ang dakpon kay kahibalo man pud sila ang siguroon ni Eric sa pagdakop si Peach ug mohapit paggakos si Eric kada dakop niya ni Peach.
Sa pagpanguli mora pud og korek si Eric nga muhatod ni Peach sa pinuy-anan niini ug kasagaran didto sila mag-estorya sa usa ka mangga nga ang puno-an nga duol kaayo sa yuta diin didto sila magtapad paglingkod.
Mora pud sila’g mga dagkong tawo kay si Eric mamisita pa sa balay nila Peach kada walay klase ug hasta mga igsuon ni Peach nga maayo pud og pagtagad ngadto kang Eric. May idalit pud si Eric nga mga sulat nga pinatagalog ug may I love you pang gisulat inubanan pud og buwak nga artificial.
Nagkabuwag ang ilang mga dalan sa dihang mi-gradwar sila sa elementarya. Sa usa ka pribadong tunghaan nga naa sa downtown misulod si Peach. Ug si Eric sa pinakaduol nga tunghaan sa high-school wala na gyud hingpit sila magkita hangtud nga nakabalita nalang si Eric sa amigo niya nga silingan nilang Peach nga may laing hinigugma na kini. Wala dangti’g siyam-siyam may nakaila-ila pud si Eric nga nakapapitik og balik sa dughan niya nga maoy hinigugma niya karon.
Taas nga nakapanghupaw si Eric human mahinumdoman ang mga kaagi kaniadto. “Bata pa gyud,” ni Eric pa nga nahimuot sa kaugalingon. (Kataposan)