Gula 52
Gihingpit gayod ni Abigail ang iyang paglikay kang Harvey. Ang iyang gihimo maoy dugang sakripisyo sa kaugalingon niyang pagbati.
Nahigugma siya kang Harvey pero dili siya motuo nga nahigugma usab kini kaniya. Alang niya, usa ka pagbugal-bugal ang pagpangulitawo ni Harvey kaniya. Maoy nagdako sa iyang hunahuna nga imposibleng mahigugma si Harvey sa usa ka babaye nga sama lang kaniya.
Sa misunod nga mga adlaw, nakamatikod si Abigail nga wala na mosulod si Krista sa school campus. Wala na kini mutambong sa klase. Walay nasayod kun unsa nay nahitabo kaniya.
Apan misantop sa hunahuna ni Abigail nga nahinayon gayod tingali ang pagmabdos ni Krista ug dako na ang tiyan niini maong napugos kini paghunong sa pagtuon. Basin maulaw na kining makita sa ubang mga estudyante nga nagbusyad na ang tiyan, labina nga mora’g wala gayo’y interes si Harvey sa pagpakasal niini. O ba kaha, ang mga ginikanan ni Krista maoy nagbuot nga mohunong na kini sa pag-eskuyla.
Tulin nga nanglabay ang mga adlaw. Miabot ang final exam nila ni Abigail dayong tak-op sa second semester.
Pagkatapos sa second semester, si Abigail mipauli sa ilang lungsod sa Villaba. Nalipay siya kay gikauban na sab niya ang iyang nga ginikanan ug igsuon. Nabatyagan niya ang kanindot sa bonding sa pamilya.
Sa pagbakasyon ni Abigail sa Villaba, nakabaton siya’g talagsaong peace of mind. Nasinati niya ang karelaks sa hunahuna. Walay kabalaka. Walay kahasol. Ug dili na makasamok si Harvey kaniya.
Usa ka adlaw niana, si Abigail rang usa ang nahibilin sa ilang balay. Ang iyang mga ginikanan ug igsuon miadto sa sentro sa barangay aron manan-aw og kalingawan. Nagsingabot na man gud ang pangilin sa ilang dapit. Siya ray nahibilin sa balay kay wala man siya’y hilig pagtan-aw og mga kalingawan. Mahiligon siya sa pag-inusara.
Wala magdahom si Abigail nga kalit mahitungha si Harvey sa ilang dapit. Wala siya masayod kun nganong nakatultol kini sa ilang gipuy-an. Wala na siya makahimo paglikay sa ulitawo.
“We need to talk,” nagkanayon si Harvey.
“Wa na tay angay pang panagsultihan,” tubag ni Abigail.
“Aduna, Abigail. Di mahimong mag-ingon ini lang ta hangtod sa hangtod. Kinahanglang magprangkahay ta kun unsay tinuod natong gibati sa usag-usa!” -- Taposon sunod gula