Batid nga piyanista nahimong ungo

Matag higayon nga motugtog si Absalon sa piyano dili gyud niya tuyoon nga mahinumdom siya kang Flordelis. Maanyag si Flordelis ug nagtrabaho kini sa usa ka fashion house isip usa ka designer sa mga nagkalainlaing moda sa mga sinena sa babaye.

Sa una pa lang niyang kakita kang Flordelis ingon sa dili na siya makatulog. Buot na niyang isulti niini nga siya may pagbati sa dalaga. Apan sa matag higayon nga magkaatubangay na sila ingon sa gigakotan ang iyang baba.

Dili siya makalitok sa mga pulong nga gikan sa iyang kasingkasing. Talawan ka Absalon!Talawan ka! gitulisok niya ang iyang kaugalingon. Unya, usa ka hapon midalikyat siya sa fashion house diin mag-alagad si Flordelis ug iya kining giimbitar nga mangaon sa gawas.

Misugot ang dalaga. Ug dinhi iyang gisulti sa dalaga nga usa siya ka piyanista. Didto siya magtuon sa iyang pagka-piyanista sa Vienna, Austria kay lagi mga adunahan man ang iyang mga ginikanan. Mipahiyom lang si Flordelis human masayod sa iyang pagka-tawo kun unsa siya.

“Abi nimo, no, type nako ang usa ka piyanista. May gi-compose ka nang awit, Absalon?” ni Flordelis pa nga nangutana.

“Duna na, daghan pa ko’g natagik nga mga awit pinaagi sa piyano ug sa higayon nga ganahan ko ako silang tugtogon,” tubag ni Absalon.

“Gusto ko nga imo kong tagikan og awit, okey ba?” hangyo sa dalaga.

“Way problema basta ikaw, Flor,” daling tubag sa ulitawo.

Ug didto magsugod ang ilang panagsuod nga misangko ngadto sa pagminahalay.

“Nahuman ko na ang gitagik kong awit para nimo, Flor,” ni Absalon pa nga mapahiyomon.

“Mao ba, aw, thank you diay kaayo, ha, Absalon. Kuan diay ako na ang mangimbitar nimo. Adto ta sa balay karong gabii kay naa sila si Papa ug Mama nako. Unsa man, okey ka?” mitutok si Flordelis kang Absalon. Miyango ang ulitawo sa pag-uyon.

Tuod, gipailaila dayon ni Flordelis si Absalon sa iyang mga ginikanan ug mora’g nakaayon sila kang Absalon nga maoy mahimo niining hinigugma.

Unya, kay adunahan man sila si Flordelis sama usab kanila ni Absalon, dihay piyano sa sala. Dako ang balay nila Flordelis.

Mitugtog siAbsalon sa piyano human siya paimna ni Flordelis sa mahalong bino. Ang iyang gitugtog mao ang gitagik niyang awit alang kang Flordelis ug nakita ni Absalon nga nagsayaw ang inahan ug amahan ni Flordelis ug sa sunod niyang paglingi mao nay nakita ni Absalon nga mga laksot na og mga hitsura ang mga ginikanan ni Flordelis.

Mihunong si Absalon sa iyang pagpiyano. Mora’g nalipong siya ug unya sa iyang pagyanghag maoy iyang nakita si Flordelis nga laksot na usab kaayo’g dagway.

“Ayaw kahadlok nako, Absalon, kay karong taudtaod maingon ka na usab niini sama namo. Oo, mga ungo kami. Mausab ang among mga hitsura inig subang sa takdol nga buwan,” mipahiyom si Flordelis.

Taudtaod nahimong laksot si Absalon ug sa iyang nasayran may gipainom si Flordelis kaniya. Apan wala siya maguol ug mabalaka kay gusto usab niya nga mahisama siya kang Flordelis, ang babaye nga iyang gipakamutya ug gimahal. Ug iyang gisayaw si Flordelis bisag wala nay honi sa piyano. (Kataposan)