Ulipon sa gugma

Gula 48

Daw wala magdahom si Michael nga mahitungha si Abigail sa Ormoc Lanes Sports Center. Mihunong kini sa pagdula og billiards pagkakita niini sa iyang pag-abot. Miduol kini kaniya.

“Nganong nahiabot ka man dinhi?” Gipangutana si Abigail sa ulitawo.

“Ikaw ang akong tuyo,” tul-id nga tubag sa dalaga.

“May problema ba?”

“Mao kanay gusto nakong sutaon.”

Nakamatikod si Abigail nga gitutokan siya ni Michael.

“Nganong usa ka semana ka na man nga wa mopakita sa eskuylahan?” Miligdong ang nawong ni Abigail samtang mipasupot sa maong pangutana.

“Duna koy importanteng giatiman,” tubag sa ulitawo.

“Importanteng giatiman?” Mas importante pa ba kana kay sa imong pagtuon?” wala kapugngi ni Abigail ang pagtungas sa iyang tingog.

Nanglingi ang mga lalaking nagdula og bilyar dili layo kanila.

“Mas maayo tingaling mangita ta’g dapit nga magkasulti ta’g maayo,” misugyot si Michael.

Namiya sila sa sports center. Nanakay sila’g traysikol ug nagpahatod sa downtown. Misulod sila sa usa ka luhong kan-anan. Si Michael ang miorder sa ilang pagkaon. Samtang nangaon, gisugdan nila ang panagkabildo.

“Unsay hinungdan sa sagunson mong pagpalta sa klase?” Gipangutana ni Abigail si Michael dihang naghinunga-tunga na sila sa pangaon.

“Personal nga hinungdan,” tul-id nga tubag ni Michael. “Pasabton ko ikaw sa tanan inigkahuman nato’g pangaon. Okey?”

Gitibawas nila ang pagpangaon.

“Karon suginli na ko, Michael,” apura ni Abigail human sa pangaon.

“Sure,” ni Michael. “Panahon nang masayod ka sa akong hukom.”

“U-unsay buot mong ipasabot?”

“Nahinumdom ka nga gisultihan ko ikaw nga adunay labing dakong desisyon nga angay kong himuon sa akong kinabuhi?”

“O-oo. Ngano man diay?”

“Nahinumdom ka ba usab nga dihay higayon nga gusto ka untang makigbuwag nako pero wa ko mosugot?”

“N-nahinumdom ko. Pero di na ko gustong maghisgot kita niadto.”

“Nakahukom na ko karon, Abigail.”

“Sa unsa?”

“Mosugot na kong magbuwag ta. Ihatag ko na kanimo ang imong kagawasan!” -- Sumpayan pa