Room for rent

Gula 43

Nakabantay ko nga maoy gitutokan ni Albert ang bus-ok kaayo nakong dughan. Dihang ako siyang gitan-aw, gidali niya pagbawi ang iyang panan-aw gikan sa akong boobs. Mitan-aw siya nako.

“Wa pa gyud ko makakita sa imong mister,” nagkanayon si Albert.

“Unya makakita ka na niya,” nako pa. “Mopauli na siya unya dinhi.”

“Maayo hinuon aron magkahimamat mi.”

Milunga ko sa pagpakigsulti ni Albert. Nagtak-ang ko’g linung-ag nga kan-on. Ug samtang nagpaabot nga maluto ang akong gilung-ag, nagpadayon na sab ang panagkabildo namo ni Albert.

Nasayran ko nga taga Narvacan, Ilocos Sur diay ang iyang amahan. Taga Bacung, Negros Oriental usab ang iyang inahan. Sa Ilocos siya natawo. Pero sa Negros na siya nagdako. Maantigo siyang mosulti’g Binisaya ug ingon man Iniluko.

“Nikuha unta ka’g katabang nga maoy moluto sa imong pagkaon,” gikomedyahan ko si Albert iyang gisusi kun nahubsan na ba sa sabaw ang iyang gilung-ag.

“Awan ti kuwarta,” nagkanayon si Albert.

“Unsa man kana? Wa man ko kasabot sa imong gisulti.”

“Pinulongang Iluko. Buot ipasabot, wa (koy) kuwarta.”

“Diay ba?”

Nagpadayon ang among panagkabildo. Nahunong lang ang among panagsulti dihang naluto na ang gilung-ag nga kan-on ni Albert. Nananghid siya nako nga mogawas sa balay aron mopalit og sud-an.

Sa akong bahin, wala koy planong mopalit og sud-an. Inigkaluto sa gilung-ag nakong kan-on alang sa paniudto, wala na koy laing lutoon. Maoy akong giplanong isud-an ang gipalit nako (dugay na) nga Argentina sisig. Usa kini sa kinaham nakong canned goods.

Human naluto ang akong gilung-ag, misulod ko’g balik sa lawak. Mihigda ko sa kama. Niining higayona, gibati ko na ang kakatulgon. Mitarong ko sa paghigda nga naghayang. Wala madugay, nakatulog ko.

Pasado ala una na sa akong pagmata. Naniudto ko’g dali-dali. Pagkahuman naligo. Pagbalik nako sa lawak gikan sa banyo, maoy akong natukmaan nga nag-ring ang akong cellphone. Gidali ko kini pagsusi. Si Kenneth ang nitawag. -- Sumpayan pa