Ang lisud nga kamatuoran

Si Jana usa ka anak sa usa ka adunahan nga pamilya nga nagpuyo sa Cagayan de Oro. Makamao, may talento, ug may taas nga ambisyon. Nagradwar siya sa elementarya nga nakab-ot ang pagka-salutatorian. Nakahuman sa sekondarya nga balediktoryan sa inilang tunghaan. Dako ang iyang kalipay tungod sa iyang nakab-ot sa iyang kinabuhi.

Pag-abot sa adlaw sa gradwasyon, nahibaw-an niya nga naospital ang iyang inahan ug dali niya kining giadto sa tambalanan.

Niadtong tungora didto niya nahibaw-an ang lisud nga kamatuoran sa iyang kinabuhi ug siya naghilak nga niatubang ug nakig-istorya sa iyang inahan.

"Ma, ngano mang wala kay gisulti nako bahin sa imong sakit? Wala ba ako'y katungod nga makahibalo bahin niini Ma, tubaga ko Ma!" Matud pa ni Jana.

"Anak paminawa ako og maayo, dili na ako magdugay niining kalibutana ug gusto kong una ko mopanaw, makahibalo ka sa kamatuoran bahin sa imong kaugalingon."

"Ayaw pag-ingon ana Ma! Dili ka pa mamatay! Unsay buot mong ipasabot nga dapat nakong masayran? Unsa man kana Ma?" Pangutana ni Jana nga nagtulo ang mga luha.

"Anak, Jana, dili ka namo tinuod nga anak ni Papa mo. Balik sa tinuod mong ginikanan sa Cebu. Pangitaa ang tinuod mong ginikanan Jana ... kay lisud ang imong kinabuhi kung diri ka magpabilin sa imong amahan. Gigamit ka lang ni Papa mo Jana. Inig-abot sa sakto mong pangidaron, ipakasal ka niya sa anak sa suod niyang higala aron makab-ot niya ang iyang tanang gusto. Dili ko gusto nga mahitabo kana nimo! Dili ko gustong mag-antos ka sa butang nga sakit sa imong kaugalingon. Didto sa imong kwarto tua kay secret chamber sa ilawom sa imong kama. Tua ang tanan mong panginahanglunon Jana. Adto sa Cebu pangitaa ang tinuod mong ginikanan, ayaw pagpananghid sa imong amahan .... tumana ang akong gisulti. Gihigugma ko ikaw sama sa tinuod kong anak Jana..." matud pa sa iyang inahan nga naglisud na sa pag-ginhawa."

Ug nawagtangan na’g pulso ang iyang inahan. Mipanaw na gayud kini sa kalibuan.

"Bangon, Ma, di ba niingon ka nga dili ko nimo biyaan! Ang sulti ni Jana nga naghilak ug naghagulhol.

Pagkahuman sa pila ka gutlo, gipahiran niya ang iyang mga luha. Gihagkan ug gigakos niya ang iyang inahan sa katapusang higayon.

Gituman ni Jana ang gisulti sa iyang inahan, milarga siya sa Cebu ug gipangita ang tinuod niyang ginikanan. Wala sab gayud siya pakyasa kay nakita niya kini kauban sa iyang duha ka mga igsuon. Nakita niya ug nabati ang kalisud sa ilang kahimtang. Dili na parehas sa una ang iyang kinabuhi nga nagbaton sa kaharuhay.

Pero siya determinado ug may ambisyon nga makahuman sa iyang pagtungha. Nakasulod siya og scholarship sa usa ka unibersidad sa Sugbo ug nagtrabaho pagkasekretarya sa usa ka kompanya.

Pagkasunod nga tuig, dili gayud malikayan nga makasagubang siya og problema sa dihang hapit siya matangtang sa scholarship tungod kay wala na makamentina sa grado nga gikasabutan. Pursigido gayud siya, mi-take siya og working scholarship sa maong tunghaan. Ug kalooy sa Ginoo, gitugot gihapon kini ngadto kaniya.

Karon nagpadayon gihapon siya sa pagtungha samtang magtrabaho pud matag gabii sa usa sa mga call center sa Sugbo. Gamay nalang pag-antos ang iyang sagubangon aron makab-ot ang iyang ambisyon sa kinabuhi. (Kataposan)