Giurom sa kahidlaw

Gumikan sa kanunay'ng pagpamuwaw og bantay ni Miyoy, ug inatiman sa iyang iring nga bag-ong nanganak ... kanunay na lang siya nga manghuy-ab ... hangtud nga siya duyanon sa katulogon.

"Ug ingon na lang sad ang mahitabo kanimo nga magpunay ka na lang og bantay nianang iring nga bag-ong nanganak, unsaon paman nimo pagkalugar aron matag gabii ... imong mabisitahan si Nisya?" dihay kaluming sa sinultihan sa inahan ni Miyoy, nga nagsud-ong sa iyang anak nga hapit dili na lang matulog og inatiman sa ilang iring.

"Kay wa man gayod ako sugta ni Nisya ... Nay Benita, palabihon ko na lang og atiman ning atong iring nga bag-ong nanganak."

Wa na lang mokibo ang inahan ni Miyoy, nga taudtaod na usab nga nabiyuda. Naluoy man god siya sa iyang anak, nga nagpabilin na lang nga ulitawong guwang?

Ang tinuod ... nagmata lang og buntag ang inahan ni Miyoy, nga sa wa pa manganak ang ilang iring ... hapit kada gabii, mamisita si Miyoy, sa pinuy-anan ni Nisya, ning ilang balangay sa Libo.

Dili gyod niya balihon ... ang katungason sa dalan nga iyang maagian. Apan kapakyas lang gihapon ang iyang maangkon. Sama sa miaging duha na ka buwan ang milabay, nga sa wa pa gani siya makatikang sa unang ang-ang sa hagdanan nila ni Nisya, gidespatsar na siya sa maong babaye nga iyang hinalaran nga nagkanayon:

"Mas maayo pang manaug ka na lang og timprano Miyoy, kay sa magsud-ong ko nimo og dugay nga dili lang tuyoon ako kasukaon!" ni Nisya pa nga nangulihad atubangan ni Miyoy.

Kinsa ba goy ulitawo nga dili madani sa kaanyag nga nahuptan ni Nisya? Hilabihan god kahubag ang iyang pus-on nga ingon sa tinuyo og kurba sa pagkalalik sa kinaiyahan?

Halawom nga gabii kadto sa adlaw'ng Sabado. Giduka si Miyoy ... hangtod nga gisaog siya sa limbo sa katulogon.

Nagdamgo siya nga diha kuno sa iyang kiliran si Nisya. Iya kuno nga gipisil ang tuong tudlo sa maong babaye nga natingban sa iyang pagmahal.

Ambot unsang pagkaunsaa ... nga iya man dayon nga giukoban ang kanipis sa ngabil sa maong babaye? Dihay iyang kahibulong, nga hilabihan kuno kabalhiboon sa tanang lawas ni Nisya.

"Minggggg .... minggggg!" maoy nakapahipugwat sa iyang pagdamgo ang kainggit sa miyaw sa iring nga gipakaingon niya kun si Nisya nga maoy nakapaurom sa kahidlaw.

Igo na lang siya nakasinggit sa kahapdos sa kinawrasan sa ilang iring. (Kataposan)