Ug mitagam ang bagis

Daw misilaob ang pamatyag ni Kardo sa iyang lawas gumikan sa tumang kapungot! Mikagot ang iyang mga ngipon ug nagpangumo ang iyang mga kamot samtang nagpanghuyad usab ang iyang mga tiil kay gusto nang moatake ngadto sa tawong midaugdaog kaniya.

"Sige, dasdas dayon aron matilawan mo kining praktisado kong kinumo!" Hagit sa bagis kang Kardo dayong sinyas niini sa pagduol ginamit ang usa ka tudlo.

Miginhawa og lawom si Kardo sa tuyo nga moluag ang mihuot niyang dughan. Unya gipunit niya ang iyang mga notebook nga mipasad sa konkretong salog sa eskuylahan nga iya karong nahimutangan. Gilunggob man god sa bagis ang dala niyang mga notebook ug gisabod kini sa salog. Pagkatapos, milakaw si Kardo palayo sa pundok sa mga bagis nga gipangulohan ni Fred nga kauban da usab niya sa klase sa ikaupat nga ang-ang sa High School.

Sa pangedaron ni Kardo nga napulog unom nagbaton na siya’g panghunahuna nga iya sa dakong tawo. Hilomon si Kardo ug mahigugmaon sa kalinaw kay mao man usab kini ang mithi sa iyang inahan nga si Mama niya Mayling. Buhi kanunay sa iyang hunahuna ang mga pulong ni Mama niya nga likayan gayod ang kagubot ug batonan kanunay ang kalinaw. Ug mipakapin pa ang iyang inahan sa pag-ingon nga kun mahimo man nga mapalit ang kalinaw, iya na kining         paliton!

"Asa ka paingon, talawan?"

Napaurong si Kardo sa iyang paglakaw ug milingi sa iyang likod dihang nabati niya ang maisugong tingog sa usa ka lalake. Ning higayona diha na siya sa gawas sa gate sa eskuylahan ug padulong na nga mopauli sa ilang balay. Ug sa iyang paglingi maoy iyang nakita si Fred nga nag-inusarang miapas kaniya. Daw irong buang ang dagway niini nga buot nang mopaak kaniya. Apan wala kini hatagi og pagtagad ni Kardo, hinuon, mipadayon lamang siya sa iyang paglakaw.

"Nganong wala ka man motubag, ha?" Singgaak ni Fred dayong kab-ot sa abaga ni Kardo. Dihadiha gikuptan ni Kardo ang kamot ni Fred nga migunit sa iyang abaga ug kalit niya kining gibunlot nga maoy nakapabarag sa bagis kinsa wala magtuo nga mosukol diay kaniya si Kardo. Gibuhian ni Kardo ang bukton ni Fred kinsa nangimbisog nga dili matumba ug gidabudabohan dayon niya kini sa nagpungasi niyang kinumo. Wala gyod undangi ni Kardo sa pagmakmak si Fred hangtod nga nahagsa kini sa yuta. Unya midasmag na usab si Kardo ngadto sa nagkulob nga bagis ug giyatakan ang tangkugo niini.

"H-Husto na, Bay Kardo! Husto na intawon..." Singgit-pakiluoy ni Fred samtang nangimbisog kini nga makalingkawas sa tiil ni Kardo nga nakapatong sa iyang tangkugo. Milunga si Kardo ug giagak si Fred sa pagpabarog.

"Sorry kaayo, Bay Fred! Nalimot kos akong kaugalingon ug nakasukol ko nimo!" ni Kardo pa dayong pikpik sa abaga ni Fred.

"Nasayop ko sa akong pagtuo, Bay! Nagtuo kong talawan ka apan dili diay," ni Fred pa dayong punit sa mipasad nga mga notebook ni Kardo. "Isog ka diay apan taas ka lang og pasensiya. Pasayloa ko sa akong pagdaugdaog nimo ug isaad kong dili na tika binuangan!"

Gidawat ni Kardo ang kamot ni Fred ug naglamanohay sila. Ug tapos makuha ni Kardo ang notebook niya nga gitunol sa giilang bagis, mipadayon siya sa paglakaw pauli sa ilang balay nga gaan ang mga lakang ug luag na ang dughan kay nakahungaw na man ang iyang kapungot! (Kataposan)