Gula 35
Naatol nga maoy pagpaingon nako sa banyo aron maligo dihang gipanghakot ang mga butang sa lalaki gikan sa silong aron ipahimutang sa kuwarto nga iyang abangan. Gitimbaya ko niya pagkakita niya kanako.
“Good morning,” niya pa.
“Good morning,” mibalos ko pagtimbaya. “Anhi ka na gyud diay puyo?”
“Oo. Mas maayo dinhi kay pabor kaayo sa akong trabaho.”
“Hain ka man diay magtrabaho?”
“Sa Subangdaku, Mandaue. Pero nia pa dapit dinhi sa Cebu City.”
“Unya, nag-ilaila mi.
“Albert Ditan,” niya pa dayong tunol sa binukhad niyang kamot.
“Tawga lang ko’g Phoebe,” nako pa. “Phoebe Cuino.”
“Gikalipay ko ang atong panaghimamat, Miss Phoebe.”
“Misis na ko...”
“Oh, I’m sorry. Abi ko’g dalaga ka pa. Wa ko magdahom nga may bana ka na. Mora man gud og wa ka pa maunsaay sa panahon.”
Igo lang kong mipahiyom sa iyang gisulti.
“Hain man ang imong bana?” Nangutana si Albert nako.
“Mao pa lang gyu’y paggikan niya paingon sa trabaho sa imong pag-abot,” maoy akong tubag. “Nagkabailos lang mo.”
“Unsa man diay iyang trabaho?”
“Credit investigator siya sa usa ka lending company. Ikaw? Unsa man say imong trabaho?”
“Business analyst ko sa usa ka dakong kompaniya dinhi sa Sugbu.”
Human sa taudtaod namong panagsulti nananghid na ko kang Albert nga mosulod na sa banyo. Aron sab makapadayon na siya sa pagpahimutang sa iyang mga gamit sulod sa kuwarto nga iyang okupahan.
Milahos na ko sa banyo ug naligo. Pagkahuman, mibalik ko sa kuwarto ug nag-ilis. Nag-apas ko nga dili ma-late sa sabot namo ni Kenneth. Imbes gud nga sa hapon pa unta kami magkita, gisawuso namo kini sa buntag karong adlawa kay may mahinungdanon kong lakaw inigkahapon kauban si Denver. Wedding anniversary man sab gud namo ni Denver karong adlawa ug nagkasabot ming mag-dinner sa gawas. Simple lang gud nga pagsaulog.
Mibiya dayon ko sa balay aron makigkita kang Kenneth sa among tagboanan sa downtown. Gidala dayon ko niya sa usa ka motel. Didto, nag-short time mi. -- Sumpayan pa