Ang batig nawong kong boyfriend

Gisulug-sulog ako sa akong mga amiga sa gitrabahoan kong office sa siyudad. Apan gikataw-an ko lang sila. Naanad na ko sa ilang pagpanaway sa akong boyfriend nga si Ador.

"Haayyy! Buta gyod ang gugma!"

"Molang. O kaha nagpiyong si Carmela nga misugot kang Ador!"

"Kadaghang mga guwapo nga nangulitawo niya unya ang bati’g nawong pa gyud ang iyang gisugot!"

Nakapanglingo ako nga mitan-aw sa tulo nako ka officemate. Nag-snack kami sa canteen sa kompaniya nga among gitrabahoan.

"Wa gyud mo tak-i sa inyong bating komentaryo sa akong trato?" Bisag makalagot ang akong mga amiga, apan nagpahiyom gihapon ko. Tinuod man sab ang ilang gisulti. Batig nawong si Ador. Apan love nako siya. Di ang panggawas nga hitsura ang akong gitan-aw, kondili ang kinaiya. Buotan si Ador. Matinud-anon siya sa iyang feeling nako.

One year na ang among relationship. Nagtrabaho siya sa usa ka kompaniya sa softdrinks. Nakahuman siya sa Accountancy. Ang importante, nga nagkasabot kami si Ador. Managsama kamig likes ug dislikes. Compatible gyud kami.

Paggawas nako sa opisina, naghulat na nako si Ador sa gawas. Maoy among sabot nga sa uptown kami manihapon unya manan-aw kamig sine. Day-off niya niadtong adlawa.

"Kanus-a ta magpakasal, Car?"

Mihunong ko pagkaon. Alas siyete sa gabii na.

"Ikaw ang akong giagad, Dor. Husto na man sab ta sa edad."

"Sige, makigsabot pa ko sa akong mga ginikanan kun kanus-a kami mamalaye nimo."

Nagkuptanay kami sa kamot si Ador nga nanggawas sa restawran sa uptown. Nagtaksi kami paingon sa Colon. Nanan-aw kamig T2, usa ka horror movie.

Medyo lawom na ang gabii sa akong pagpauli sa among balay sa Dignos Compound sa Gorordo Avenue. Apan nagmata pa sila si Papa Art ug Mama Cristina. Nag-away na sab sila.

"Nganong karon ka lang mopauli? Didto ka na sab sa imong babaye, no?"

Isog kaayo si Mama nga mitulisok kang Papa. Wala lang gani ko nila tagda nga misulod sa sala. Aduna akoy kaugalingong yawe sa pultahan sa among sala.

Naglagot ko nga misulod sa akong lawak. Ako na lang ang single namong upat ka magsoon. Ako ang kamanghoran. Ang akong mga magulang pulos na minyo ug may kaugalingon nang pinuy-anan sa siyudad.

Ingon sila si Mama ug Papa niini kanunay. Milagro ang adlaw o gabii nga dili sila mag-away. Puwerteng abubhoan ni Mama. Guwapo man god si Papa. Way pagsalig si Mama sa akong amahan. Dako ang iyang pagtuo nga adunay laing babaye si Papa tungod sa kaguwapo niini. Apan nasayod ko nga buotan si Papa. Magabhian lang siya usahay sa pagpauli tungod kay mag-overtime man siya sa gitrabahoang Construction Firm. Usa ka engineer ang akong amahan.

Kun nasayod lang ang akong mga amiga niini, seguradong hisabtan nila ako kun nganong bati’g nawong ang gipili kong mahimong boyfriend. Samtang naghigda ako sa akong kama, nahunahuna ko si Ador. Bati man tuod siyag nawong, apan nakaseguro ako nga magmalipayon ako kaniya, ug magmalinawon ang among panagpuyo.

Naghinam-hinam na ko sa pag-abot sa adlaw nga kami hiusahon na sa kaminyoon. Kataposan