Room for rent

Gula 34

Taudtaod gyud nakong gitutokan ang lalaki nga akong gikaatubang. Wala ko makasabot sa akong kaugalingon kun nganong mora’g gilamat man ko sa iyang kaambong. Minyo ka na, Phoebe! Mora’g gibadlong ko sa akong konsensiya aron dili magpatuyang sa akong gibati.

“U-unsay akong ikaalagad nimo, Mister?” Gipangutana ko ang lalaki dihang nabalikan na ko sa saktong panghunahuna.

“Mag-inquire lang unta ko, Miss,” niya pa.

“Unsa kana?”

“Nakabasa man gud ko sa gibutang nga pahibalo sa gawas nga naay room for rent dinhi. Duna pa bay bakante?”

“Aduna pa. Mora’g duha pa man tingali kana ka kuwarto.”

“Ikaw bay tag-iya ning balaya?”

“Dili. Boarder ra sab ko dinhi. Polis ang tag-iya ning balaya.”

“Kun mao kana, kinsa may akong pakigsabotan kun mo-rent ko?”

“Nia man ang iyang asawa. Kamo lay pag-estorya.”

Gidala nako ang lalaki ngadto sa atubangan ni Mrs. Daya Rambaud, ang asawa ni Mateo Rambaud nga tag-iya sa balay. Dihang nagkasulti na sila, misaka ko sa taas sa balay diin nahimutang ang lawak namo ni Denver. Mihigda ko sa kama sulod sa lawak.

Pagkataodtaod, nabati ko nga may mga tunob nga misaka sa taas. May mga tingog sa lalaki ug babaye nga nag-estoryahanay. Tingog ni Mrs. Rambaud ug sa lalaking nag-inquire bahin sa room for rent ang akong nadungog. Gitan-aw tingali sa maong lalaki ang bakanteng kuwarto.

 Ambot kun unsang matanga sa bakukang ang misulod sa akong ulo. Mao na lay akong namatngonan nga mitimbakuwas ko’g bangon gikan sa kama. Migawas ko sa lawak, dili aron magpakisayod kun nagkasinabot ba sila si Mrs. Rambaud ug ang lalaking buot moabang, kundili tungod kay gusto kong makakita pag-usab sa lalaking ambongan nga mora’g si Brad Pitt.

Nagpaantaw lang ko nila. Pero dihang nakamatikod ang lalaki sa akong paggawas sa kuwarto, iya kong gikidhatan. Gipahiyoman ko siya. Ambot ba kun nganong gi-kilig man ko sa iyang pagkidhat nako!

Nianang pagkaugma, mibalik ang ambongang lalaki. Nagdala na siya sa iyang mga gamit. Wala ko makasabot sa akong kaugalingon kun nganong mora’g nalipay ko sa pagbalik sa lalaki aron moabang sa pagpuyo sa balay nga amo sab nga giabangan. -- Sumpayan pa