Ulipon sa gugma

Gula 36

Sa tinud-anay, nasuta ug natugkad ni Abigail sa iyang kaugalingon nga wala siya mahigugma kang Michael. Si Harvey pa gihapon ang gipitik sa iyang kasingkasing bisan sa kamatuoran nga iyang nasayran nga girlfriend na niini si Krista.

Mibati na hinuon og kaluoy si Abigail kang Michael. Nakita man gud niya nga may kausaban na ang kinabuhi sa ulitawo. Nagtarong na kini sa pag-eskuyla human niya tambagi. Ug bisan palekiro kini, ni-behave kini sa iyang atubangan sa higayon nga silay mag-uban.

Iyang namatikdan nga may dakong respeto si Michael sa iyang pagka-babaye ug naningkamot kini nga ma-appreciate niya ang binuhatan niini.

Ug ang kaluoy nga iyang gibati ngadto kang Michael mao na tingali sinugdanan aron ma-develop siya sa paghigugma ngadto niini. Kana kun tinuod nga ang kasingkasing katudloan aron mahigugma.

Sa gihapon, may daghang reservation si Abigail. Anaa ang kabalaka nga tingalig dula-dulaan lang siya sa lalaki nga iyang ikarelasyon. Wala siya makasabot sa iyang kaugalingon kun nganong daw may phobia man siya sa uyab-uyab nga unta wala pa man siya makasulay sa pagpakigrelasyon sa usa ka lalaki sukad masukad.

Negatibo ra ba kaayo ang iyang hunahuna? O mapanagan-on lang siya kaayo? O kaha tungod sa gisagop niyang konsepto nga ang mga guwapa ray dunay katungod nga higugmaon? Dili siya gustong masakitan!

Pero karon lagi, wala man unta siya makigrelasyon. Pero nasakitan siya kay ang lalaki nga gihigugma niya sa hilom nakigrelasyon man sa laing babaye. Niini, na-realize niya nga makigrelasyon man siya o dili, masakitan gihapon siya kun ang gugma dili alang kaniya. Busa, mas maayo pag-makigrelasyon siya! Tun-an niya ang iyang kaugalingon sa paghigugma kang Michael. Ug bahala na. Nakadesisyon na siya.

Mao nga sa sunod higayon nga misukna si Michael mahitungod sa gugmang gihalad niini kaniya, gisugot na ni Abigail ang ulitawo.

“Tinuod ka, Abigail?” Daw dili makatuo si Michael sa iyang hukom.

“Wa ko magtiaw, Michael,” ni Abigail pa. “Hinaot nga di ko nimo pasakitan. Unang higayon kining nakigrelasyon ko’g lalaki.”

Sukad niadto, malipayon na kanunay sila si Michael ug Abigail. Sa sulod ug gawas sa tulonghaan, mamatikdan ang ilang sweetness. Wala malilong ngadto sa ubang mga estudyante ang ilang relasyon. Apan dakong supak si Harvey sa pagpakigrelasyon ni Abigail kang Michael. -- Sumpayan pa