Ulipon sa gugma

Gula 34

Alang kang Abigail, wala na sila’y angay panagsultihan si Krista. Apan kay mihangyo man si Krista nga makigsulti kaniya, mihatag og higayon si Abigail. Sulod sa library, nagsultihanay silang duha.

“Sorry sa akong gibuhat nimo, ha,” nagkanayon si Krista.

“Ang hain niadto?” Nagpaguryo-guryo si Abigail.

“Kadtong akong pagtamparos nimo.”

“Aw, hikalimti na kadto. Bisan sa wa ka pa mangayog sorry, gipasaylo ko na ikaw, Miss Krista.”

“Salamat. Daghang salamat, Abigail.”

“May ihangyo lang ko nimo, Miss Krista.”

“U-unsa kana?”

“Mahala sa tinud-anay si Harvey. Gimahal ko siya isip usa ka higala. Gusto kong magmalipayon siya sa inyong relasyon.”

“Makalaom ka, Abigail.”

Human sa panagsulti nila ni Krista, gibati ni Abigail ang talagsaong kagaan sa iyang dughan. Mora bag nahusay na ang tanang conflict sa iyang kinabuhi bisan og dili pa hingpit nga hapsay ang mga panghitabo.

Bisan og dili pabor alang kaniya ang tanang mga panghitabo apan naangkon niya ang peace of mind. Ang lintunganay sa iyang kalipay mao nga nahitabo na ang reconciliation tali nila ni Krista.

Nakadugang sa iyang kalipay ang kamatuoran nga nadawat na niyang si Harvey dili angay kaniya kundili alang kini kang Krista.

“Wa kay buhaton unya?” Gipangutana ni Abigail si Michael dihang nag-abot sila sa main lobby sa tulonghaan.

Nagkadungan sila’g sulod sa tulonghaan nianang pagkapalis.

“Unsang orasa?” Pangutana ni Michael.

“Mga 6:30,” tubag ni Abigail.

“Bakante ko nianang orasa. Ngano man diay?”

“Pakuyog unta ko nimo. Manuroy ta bisan asa.”

“Okey. Deal.”

Tuod man, human sa ilang klase sa sayong kagabhion, nagdungan sila si Abigail ug Michael paggawas sa tulonghaan. Nanihapon una sila sa usa ka outlet sa Jollibee. Pagkahuman, nanuroy sila sa plasa.

“Nabag-ohan ko sa imong mga lihok karon, Abigail,” gikan ni Michael. “Morag duna kay dakong problema.” -- Sumpayan pa