Ang tagna

Si Bitoy nabiktima sa pagpangawat ug sa iyang pagtuo, ang iya rang silingan ang iyang suspect. Nahibaloan man gud niya nga kining iyang silingan, notado sa pagkakawatan sa bisan unsa nga butang.

Ang gikawat kang Bitoy mao ang usa ka mahalon nga relo. Ang gigul-an niya kay ang mao nga relo, gikan pa gayod sa States isip regalo kaniya sa iyang ig-agaw nga taudtaod nang nagtrabaho didto sa maong nasud.

Nagkapuliki siya’g susi sa iyang mga silingan basin kun dunay makatug-an kinsa gayod ang responsable. Apan, walay bisan kinsa sa mga silingan nasayod. Pulos lang sila ambot.

Dunay usa sa iyang mga silingan ang naglagot kaniya. Matud pa niya, nga kuno sukad makahupot og mahalon nga relo si Bitoy, haskang hambog na kini.

"Ako lang dinhi sa atong dapit ang dunay relo nga sama niini," pulong ni Bitoy ngadto sa iyang gikasulti. "Busa, kun dunay buot mosulti pagsupak sa kanindot sa akong relo, dili gayod ako mosugot."

"Unya, Bay, ngano man gayod nga ipanghambog mo man kanang imong relo nga hinatag ra man kana kanimo," pulong sa usa ka higala ni Bitoy. "Mas maayo pa nga kanang imong relo, imong taguon kay basin kun kawaton hinuon kana."

Tungod lagi sa kahinugon sa maong butang nga nawala, usa sa mga higala ang misugyot nga iyang ipatagna ang relo sa usa ka manalagna. Busa, miadto dayon si Bitoy sa siyudad aron ipatagna ang relo.

"Taga asa ka," pangutana sa manalagna dihang naa na siya atubangan niini! "Unsay nawala kanimo?"

"Madam, ang akong relo, nawala ug wala ko mahibalo-i kun kinsa ang nagkuha?" matud ni Bitoy atubangan sa manalagna. "Mahal kaayo ang mao nga relo."

Gipakita sa manalagna ang bulang kristal nga matud pa niini, masayran gayod niya kun kinsa ang nagkuha.

"Madam, mobayad ako sa haom nga bayad bugti sa relo ko nga nawala kun mahibalik lang kanako ang relo. Madam, unsa ba ang kaseguroan nga mahibalik ang relo ko pinaagi sa imong pagtagna?"

"Dong Bitoy, dugay na ako ning akong trabaho," pulong sa manalagna. "Busa, ayaw pagduhaduha. Ako na ang bahala. Sige! Kay tan-awon ko dinhi sa bulang kristal."

Unya, mikuha og kuwarta si Bitoy iyang gihatag ngadto sa manalagna kay iyang namatikdan nga nagpasumbingay kini nga nagkinahanglan siya’g kuwarta aron motugot ang tagna.

Wala madugay, mikatawa ang manalagna ug nagkanayon kini ngadto kang Bitoy. "Nakita ko ang imong relo!"

"Unya Madam. Asa man?" pulong ni Bitoy. "Asa naman karon?"

"Pinaagi ning bola kong kristal, ang imong relo karon, gisul-ob na sa tawong maoy nagkawat."

"Madam, wala ka kaha masayop sa imong pagtagna?"

"Uy, Dong Bitoy, taodtaod na ako ning akong trabaho ug wala pa ako masayop. Busa, nagsulti ako sa matuod nga ang imong relo naa ra sa imong silingan."

Nangigham si Bitoy...

"Madam, unsaon man pagsul-ob sa tawong nagkawat sa akong relo nga kadtong relo, wall clock man kadto?"

Dinhi nakamatikod si Bitoy nga ang manalagna, wala gayod magsulti sa tinuod. Unsaon man tuod pagsul-ob sa kawatan sa usa ka wall clock?

Mipauli si Bitoy nga huyhoy ang abaga. Ang problema karon kun unsaon nga mahibalik kaniya ang iyang relo. (Kataposan)