Room for rent

Gula 26

Nabatyagan ko nga nanginit ang akong aping pagkadungog sa gisulti ni Kenneth. Namula tingali ang akong nawong. Nakugang man gud ko pag-ayo sa gisulti ni Kenneth. Wala ko magdahom nga may kasayoran na diay siya mahitungod sa relasyon namo ni Mario.

“U-unsa may imong nasayran nga sekreto namo ni Mario?” Gipangutana ko siya. “Nganong nakaingon ka man nga may sekreto ming duha?”

“Tungod kay kanunay kong nagsunod sa imong mga lihok, Phoebe,” tubag ni Kenneth. “Gumikan sa kanunay kong pagpangitag higayon nga magkasulti ta, may mga higayon nga sundan ko ikaw kun molakaw ka. Ug dihay higayon nga miadto ka sa downtown. Gisundan tikaw. Wa ko magdahom nga si Mario diay ang imong pakigkitaan. Ug nasundan ko pa gyud kamo nga misulod sa usa ka motel dapit sa north reclamation area.”

Sa giasoy ni Kenneth, nakaingon ko sa hilom nga komprehensibo ang mga kasayoran nga iyang nahipos mahitungod kanamo ni Mario. Dili na ko maka-deny niini. Dinhi misamot ang akong kabalaka. Misantop sa akong hunahuna nga mosamot kadako ang problema kun mapakyas ko sa pagtayo-tayo kang Kenneth aron dili niini ipanabi ngadto sa lain mahitungod sa nasayran niining tinagoan namo ni Mario.

“Mao diay nga giayran mo ang akong gugma,” ni Kenneth pa, “kay naunhan na man diay ko ni Mario.”

“Mahimo ba, Kenneth,” gibadlong ko siya, “nga di una ta maghisgot niana sa pagkakaron. Sensitibo kanang maong butang. Please, di ko gusto nga may laing makabati sa atong panagsulti.”

“Okey,” ni Kenneth pa. “Unsa man ang gusto mong mahitabo karon?”

“M-magkita ta ugma,” nako pa. “Sa Ayala.”

“Unsang orasa?”

“Mga 3PM.”

“Okey, moadto ko.”

Tuod man, nianang pagkaugma, gipakigkitaan gyud nako si Kenneth didto sa Ayala. Misulod mi sa usa ka kan-anan nga dili kaayo daghan og kustomer. Nagpasuok mi. Ug samtang nangaon, nagkalingaw mi’g kabildo.

“Di na lang ko magliko-liko pa, Kenneth,” giingnan ko siya. “Bahin sa sekreto namo ni Mario nga imong nasayran ang akong tuyo nimo.”

“Ngano man?” Sukit ni Kenneth. “Nahadlok kang ibulgar ko kini?” -- Sumpayan pa