Nakamata ko sa kusog nga singgit nga dunay sunog. Nagdali kong mibangon sa gihigdaan kong double deck sa gipuy-an kong boarding house sa V. Gullas. Gipukaw ko ang tulo ka boardmate. Natarantar sila pagkasayod nga dunay sunog.
Nagdali kaming nanggawas sa boarding house. Daghan nang tawo sa gawas. Ang kamingaw sa kagabhion natugaw sa siren sa mga nangabot nga fire truck.
"Pag-ampo, Lorna. Kun di ka mobiya sa imong trabaho, masunog ang imong kalag sa impiyerno!"
Nahinumdom ko sa gisulti ni Rosella, klasmet nako sa HRM. College na ko. Tinguha nako nga makahuman og kurso apan kabos ang akong mga ginikanan sa probinsya. Mga ordinaryong mag-uuma lang sila. Lima kaming magsoon ug ako ang kamagulangan. Di makasugakod sa paggasto ang akong mga ginikanan nako maong nanimpalad ko sa siyudad.
Naglisod ako sa pagpangitag trabaho. Igo lang kong nakagradwar sa hayskol. Maoy akong tinguha nga motungha og gabii samtang nagtrabaho og maadlaw. Apan wa ko duyogi sa maayong kapalaran.
Ug mao na lay akong naamgohan nga usa na ako ka commercial sex worker. Nagbaligya ako sa akong lawas aron makatungha ko. Batan-on pa ako ug matahom. Dagkong kuwarta ang ibayad nako sa akong mga kustomer.
Ug si Rosella nasayod niini. Usa ka suod kong amiga sa unibersidad, ug kauban ko pa gyod sa klase.
"Di matuman ang akong pangandoy kun di ko magbaligya sa akong lawas, Ros. Nasayod ka na sa akong family background. Pobre lang kami." Mao kini ang gitubag ko sa akong best friend.
Nagpadayon ako sa akong trabaho. Usa ka adlaw nga hapit na ang Biyernes Santo, gidala ako ni Rosella sa simbahan. Sa unang higayon sukad ko nagbaligya sa akong dungog, nakasulod kog simbahan. Wa ko mahimutang. Nabatyagan nako nga di ako angayan sa maong dapit.
"Duol kamo sa Diyos. Pangayo kamo og pasaylo sa nabuhat ninyong kasal-anan. Di kamo talikdan sa atong Ginoo. Pagbasol kamo."
Nakahilak ako sa gisermon sa pari.
Apan bisan pa niining tanan, nagpadayon ako sa akong gibuhat. Ug karon, usa ka dakong sunog ang nahitabo duol sa akong gipuy-ang boarding house. Nagdilaab ang kalayo. Ingon ba niini ang impiyerno?
"Diyos ko, p-pasayloa ako." Hilom kong nakatuaw.
Biyernes Santo. Wa ko mopauli sa probinsiya bisan bakasyon na. Nagpabilin ko sa gipuy-an kong boarding house nga wa maabot sa sunog. Tibuok adlaw kong nagsakripisyo sa sulod sa Katedral. Naghilak kong nag-ampo.
Usa ka palad ang hinay nga mikupot sa usa nako ka abaga. Paglingi nako, si Rosella.
"Salamat, Lorna. Salamat nga nakatultol ka na sa balay sa atong Ginoo."
Mapahiyumon si Rosella nga mitupad pagluhod nako. Gipahiyoman ko sab siya.
"Salamat sab, Ros, nga pinaagi nimo nakita ko ang dako kong sala. Magbag-o na ko. Sukad karon, kabahin na ko sa atong Ginoo.":
Usa ka hukom ang natawo sa akong kasingkasing. Usa ka matahom nga desisyon. Mosulod ako sa monasteryo ug ihalad ko ang akong tibuok kinabuhi sa pag-alagad kang Hesukristo. (Kataposan)