Malipayon ko uban sa akong mga barkada. Kay anak og adunahan ug bugtong anak, nahimo kong spoiled. Saputon ko kun duna koy pangayuon sa akong parents nga di dayon nila ihatag nako. Sama karon.
"Karaan na ang akong kotse, uy. Gusto kog sports car." Nagmugtok ang akong nawong nga nakig-atubang kang Mama ug Papa sa dako ug nindot namong sala. Sayo pa lang ang kagabhion. Pulos mga negosyante ang akong parents.
"Sige, palitan ka namo ugma."
Nakagakos ko kang Papa tungod sa akong kalipay. Nahikatawa ang akong mga ginikanan. Nahimuot sila nako. Pinangga kaayo ko nila. Medicine gyod ang ilang gipakuha nako.
"Basta pag-amping gyod kanunay sa imong pag-drive, Liza."
"Oo, Ma." Ug ang akong inahan na sab ang akong gigakos.
Puwerteng lipaya sa tulo nako ka barkada kay usa ka buntag niana, mao na lay ilang nakita nga nagmaneho na ko sa brand new nakong sports car. Pulos sab anak og adunahan ang tulo nako ka amiga nga sila si Kimberly, Nora ug Vilma.
"Bunyagan nato kana, Liza!"
Nakatan-aw ko kang Kimberly. Unya miyango ko. Nanakay dayon kami sa akong kotse. Nag-joy ridng kami. Bisag diin lang kami mopaingon. Wa kami mosulod sa among klase.
Ang mao kong buhat maoy nagnudnod nako sa kaalaotan. Gisugot ko si Andro nga anak sab og dato. Nakig-live-in ako kaniya. Nagpuyo kami sa usa ka apartment nga si Andro ang nag-abang. Gikasilagan ako sa akong mga ginikanan. Apan wa ko sila tagda. Si Andro ang importante nako kay love nako siya.
Nahunong ko sa akong pagtungha. Si Andro na lang ang akong giatiman nga gipapadayon sa pagpaeskuyla sa iyang mga ginikanan sa kursong Law. Apan nagsugod ang akong kalbaryo dihang mimabdos na ako. Tagsa na lang ko paulia ni Andro. Usahay mopauli siya nga hubog.
"Wa kay labot kun diin ko. Di ti ka asawa!"
Isog kaayo siya dihang usa ka gabii gipangutana ko siya kun nganong panagsa na lang siya magpaulian sa gipuy-an namong apartment.
"May katungod kong mangutana kay nagpuyo ta ug ikaw ang amahan ning akong gisabak!"
Nangisog sab ko apan iya kong gitamparos. Nalukapa ko. Igo na lang ko sa paghilak. Ug sukad niadto, wa na ko paulia ni Andro. Wa na siya magpakita nako. Gipapahawa ko sa tag-iya sa apartment nga among gipuy-an kay wa koy ikabayad.
"Asa na lang ko mopaingon karon?" Nakabakho ko sa mapait kong gidangatan. Nagbasol ako sa akong pagka daotang anak. Unya nahinumdom ko sa akong mga ginikanan.
"Hapit na ang paghandom nato sa pagkamatay ni Jesus sa krus, Liza. Pauli sa inyo ug pangayog pasaylo sa imong mga ginikanan. Pauli ning panahon sa Semana Santa."
Gitan-aw ko si Kimberly. Naluoy siya nako. Midangop man god ko sa ila ug gisultihan ko siya sa tanang nahitabo namo ni Andro.
"Makapasaylo pa kaha sila nako, Kim?" Naghilak ko nga migakos sa akong barkada. Kami rang duha, wa ang duha ko ka barkada.
"Makapasaylo sila, Liza. Ako bitaw, gipasaylo man sa akong parents. Nakabuhat sab kog sala nila. Nag-usab na ko. Nagbinuotan na."
Pagka buntag sayo, mibiya ako sa ilang balay ni Kimberly. Nindot ang panahon. Nakita ko ang langit nga way bisan gamay nga lama sa dag-om. Unya gisubay ko ang dalan paingon sa among balay. Usa ka tul-id nga dalan nga ako nang subayon sa bag-o kong kinabuhi. (Kataposan)