Ulipon sa gugma

Gula 24

Gibuhian ni Harvey ang bukton ni Abigail nga gigunitan niini. Nangayo pag-sorry ang ulitawo kaniya. Apan mihangyo si Harvey nga makigsulti kaniya. Nasayod na diay si Harvey sa gibuhat ni Krista kaniya.

Dili na unta gusto si Abigail nga makigsulti kang Harvey sa kabalaka nga tingalig mosamot ang kasuko ni Krista kaniya. Apan ingon sa dili niya kabalibaran ang hangyo ni Harvey.

Ingon na gayud si Abigail niini. Kanunay siyang nagtinguha sa paglikay kang Harvey. Apan sa higayon nga moduol si Harvey kaniya, dili siya makahimo sa paglikay niini.

Sa canteen sulod sa school campus, nagsultihanay sila si Harvey ug Abigail. Seryoso ang ilang panagkabildo.

“Hain kahay maayo kun tamparoson ko ikaw karon?” Giingnan ni Abigail si Harvey sa pinagahi nga sinultihan.

“U-unsa?” Daw nakugang si Harvey sa gisulti sa dalaga.

“Ikaw man gud ang nakaangin nga natamparosan ko ni Krista. May nagsumbong kuno kaniya nga nagkuyog ta kagabii sa Food Park.”

“I’m sorry, Abigail. Ako’y mangayog pasaylo sa gibuhat ni Krista nimo.”

“So, klaro na gyud karon ang real score?”

“U-unsay real score?”

“Ang real score tali ninyo ni Krista. Ang imong pagpangayog pasaylo sa iyang gibuhat nako usa ka timaan nga may concern ka kaniya. Ug kana tungod kay may relasyon kamo.”

“Nasayop ka, Abigail. Wa mi relasyon si Krista. Nagtumo-tumo lang na siya’g estorya. Isip usa ka lalaki, nakasabot ko nga dako siya’g gusto nako. Pero wa ko siya patoli kay wa koy amor ngadto niya.”

Wala makatingog si Abigail. Gitutokan niya si Harvey.

“Ang akong pagpangayog pasaylo sa gibuhat ni Krista nimo naggumikan sa guilt,” pasabot ni Harvey. “Guilty ko sa nahitabo nimo tungod kay kun dili pa tungod nako, dili ka unta matamparosan ni Krista.”

“So, karon hinaut nga nakasabot ka na kun nganong gusto kong molikay nimo, Harvey,” ni Abigail pa. “Dili ko gusto’g gubot. Di ko gustong samokon mata’g karon ug unya ni Krista.”

Human sa ilang panagsulti, miuna na’g gawas si Abigail sa canteen. Mogawas na unta siya sa exit gate sa main lobby sa tulonghaan dihang may mikuhit kaniya gikan sa iyang luyo. Milingi siya. Si Michael ang iyang nakita.-- Sumpayan pa