Room for Rent

Gibasa nako ang text ni Mario.

“Unya, ha. Wait ko nimo sa motel,” maoy mensahe sa iyang SMS.

Wala ko mo-reply. Gi-off hinuon nako ang akong cellphone aron dili na kini makontak ni Mario.

Human og kaligo ni Denver, namahaw na mi. Pagkahuman, migikan na siya paingon sa iyang trabaho.

Sa nakalakaw na si Denver, gi-on nako’g balik ang akong cellphone. Nagpunay og iyagak ang akong cellphone sa pagsulod sa daghang text messages. Gikan kang Mario ang tanang text.

Usa ray unod sa iyang SMS. Nagpahinumdom nako sa iyang gipasidaan kanako nga kun dili ko motungha didto sa motel diin adto siya magpaabot nako, siya’y moanhi sa gipuy-an namo ni Denver aron maghimo’g eskandalo.

Gibati ko ang tumang kabalaka. Wala ko masayod kun unsay akong i-reply sa mga text ni Mario. Hinuon buntag pa. May igo pa kong oras sa paghunahuna og alibi aron kabalibaran ko si Mario ug makombinser usab siya sa akong pagbalibad. Maong gipuga ko ang akong kaisipan sa pagpangita’g kasulbaran sa akong problema.

Apan naudto na lang, wala gyud ko makahunahuna’g maayong paagi. May mga alibi nga misantop sa akong hunahuna apan kini taphaw ra kaayo. Nakaseguro kong dili makombinser si Mario sa akong pangatarongan.

Misamot ang akong kabalaka. Ug ang kabalaka milubad ngadto sa kalibog. Ug ang kalibog gisundalisa sa kahadlok. Nahadlok ko nga kun dili nako tumanan si Mario sa iyang gusto tinud-on niya ang iyang gibahad ug mahitabo ang dakong eskandalo sa akong kinabuhi.

Pasado alas dos sa hapon mi-ring ang akong cellphone. Ngalan ni Mario ang mi-reflect sa screen sa cellphone. Gikulbaan ko samtang gitutokan nako’g maayo ang cellphone nga nagpadayon sa pagbagting. Nagduhaduha ko sa pagtubag. Dili ko andam makigsulti kang Mario.

Nahunong ang pagbagting sa cellphone. Nakaginhawa ko’g luag. Apan pagkataudtaod, mibagting na sab kini. Gipasagdan ko lang kining magpadayon pagbagting. Wala gyud nako tubaga. Hangtod nahunong ang pagbagting.

Mitingog ang message alert tone sa cellphone. Akong gibasa ang text gikan kang Mario. Subli siyang mibahad nako nga maghimo siya’g eskandalo kun dili ko makigkita niya. Mao nga pagka-alaskuwatro sa hapon, mihukom kong makigkita kaniya! -- Sumpayan pa