Patay na si Anita Lucia

Matag gabii gyud duna gyu’y mangharana kang Anita Lucia, ang maanyag nga dalaga nga anak sa magtiayong Pater-Monica. Halos tanang mga ulitawo dinhi sa ilang balangay sa Tinubdan daw gibatobalani sa katahom ni Anita Lucia.

Sa pangidaron nga desi otso anyos dili gyud kalikayan sa mga lalaki dinhi sa ilang dapit ang pagdayeg sa katahom ni Anita Lucia. Duna nay daghang mga taga lungsod nga moanha sa balay nilang Anita Lucia nga mohangyo sa mga ginikanan niini nga paapilon kini sa Beauty Pageant nga gipasiugdahan sa komitiba sa pangilin sa lungsod apan mibalibad si Anita Lucia sa katarongan nga dili siya hilig og ingon niini nga kalihokan kay matud pa usab niya wala kuno siya’y talento sa pagrampa-rampa atubangan sa daghang manan-away.

“Kaanugon sa imong kaguwapa, uy, Anita,” ni Melito Bayot pa nga gianugonan sa katahom sa dalaga.“Na, hala, dili tika mapugos, pero kun mausab ang imong hunahuna kay layolayo pa man ang pista, sultihi lang unya ko, ha, Dayyy...”

Wala motingog si Anita Lucia. Didto sa may atbang nga kahoy, sa ilawom sa dakong punoan sa talisay hilomon kaayong nagbarog si Poldo nga nagtan-aw sa balay nilang Anita Lucia. Kini si Poldo, anak nga kinamanghoran nila ni anhing Tasya-Isyot nga dugay nang mipanaw sa laing kalibotan tungod sa ilang pagkahulog sa pangpang dihang gigukod kini sila sa mga lumolupyo sa kanait nga balangay, kay matud pa nangabat kuno og sayong hapon.

Pero, ang taga Tinubdan dili gyud motuo sa maong estorya bahin nilang Tasya ug Isyot kay mga Diosnon kaayo to silang duha. Mata’g Domingo sayo kaayo to silang manimba ug si Tasya sakop ug aktibo sa kalihokang relihiyoso sa simbahan, busa dili gyud sila motuo nga sila si nang Tasya ug noy Isyot mga ungo.

“Maayong hapon,” tingog ni Poldo nga nangatahoran.

Milumpat ang diwa ni Anita Lucia pagkabati niya sa tingog ni Poldo. Sa hilom may pagbati siya sa ulitawo apan hangtod karon wala pa gyud mopadayag sa iyang gugma nganha kaniya ang ulitawo. Ngano kaha nga dili man makasulti si Poldo sa tuyo niini kun anaa na kini sa iyang atubangan? Mao kini napulog nga mga pangutana sulod sa hunahuna sa dalaga. Kay alang kaniya naghuwat na lang siya sa pagpadayag ni Poldo.

“Dayon, Poldo,” agni ug timbaya ni Anita Lucia sa ulitawo.

Midayon og saka ang ulitawo ug maulawon kaayong milingkod tupad sa dalaga.

“Basin og dunay masuko ning akong pag-anhi dinhi nimo, Anita,” miduko ang ulitawo.

“Masuko? Kinsa may masuko? Wa may masuko?” ni Anita Lucia pa nga milubyok ang kandiis sa iyang pagpahiyom.

“Si Elpidio, ang anak sa Kapitan, di ba nanguyab man na nimo, no, Anita?” mitutok si Poldo sa dalaga.

“Oo, nanguyab siya nako, pero, wala ko mahigugma niya, uy, Poldo, duna na may gipitik ang akong kasingkasing,” tubag sa dalaga.

“Mao ba, a, kining, Anita, motuo ka kaha, nga ingnon ko ikaw nga nahigugma ko nimo, oo, dugay na...” nakasulti ra gyud si Poldo.

Mitutok si Anita Lucia kang Poldo ug didto sa ilang tinan-awan mihulagway ang kahulogan sa gugma sa usag-usa kanila. Gikuptan ni Poldo ang kamot ni Anita Lucia ug gihagkan. Unya, kalit lang miabot si Elpidio kinsa nagdalag pistola. Gitionan si Poldo. Nagselos kini sa ulitawo.

“Elpidio, ayaw ko’g tioni anang pistola, mobuto na,” ni Poldo pa nga mihana og tindog. Apan nakablit ni Elpidio ang pistola ug nakalikay si Poldo ug didto motama sa dughan ni Anita Lucia. Miutnga ang dalaga ug natumba. Midali pagbiya si Elpidio nga sagol dagan sa wala damhang mahitabo ni Anita Lucia.

Patay na si Anita Lucia. Ug si Elpidio milayas ug wa pa madakpi sa mga polis nga nangita kaniya.

Usa ka gabii, halawom nga gabii, duha ka anino ang makita nga naglingkod sa may tampi sa lugot -- si Poldo ug si Anita Lucia.

“Sila nagtuo nga patay ka na, Anita Lucia, apan way kamatayon ang sama kanatong mga kaliwat og ungo. Mamatay lang kita kun silver bullet ang ipusil kanato. Karon, malinawon na kitang duha dinhi sa halayong bukid ug dinhing dapita pasanayon ta ang atong mga kaliwat,” ug naghalok ang duruha ubos sa kahayag sa bag-ong misubang nga buwan. (Kataposan)