Room for rent

Gula 15

Gitutokan ko si Mario.

“Wa na man tingali tay angay panagsultihan,” giingnan ko siya.

“Aduna, Phoebe,” matud ni Mario. “Human sa nahitabo nato, dili mahimong likayan na lang ko nimo sa dakong kasayon.”

“Di mahimong karon ta magsulti. Hapit na mogabii. Di ko gustong mahiabot sa balay ang akong bana nga wa ko didto.”

“Okey, ikaw ang akong agdon. Kanus-a ta magkita?”

“Ugma sa udto.”

“Asa ta mag-abot?”

“Sa Colon na lang. Sa Chowking.”

Nagkasinabot mi.

Tuod man, nianang pagkaugma sa udto, gipakigkitaan ko gyud si Mario. Misantop sa akong hunahuna nga mas maayong magkadayganay na kami aron dili na siya magsamok nako. Dili na ko gustong makasala pag-usab sa akong bana. Dili na ko buot nga mabulingan pag-usab ang kaminyoon namo ni Denver tungod lang sa akong pagkabuang kang Mario.

Pagsulod nako sa Chowking, nakita dayon nako si Mario nga naglingkod sa nasuok nga bahin sa kan-anan, duol sa nahimutangan sa aircon. Miduol dayon ko sa iyang nahimutangan.

Mangaon una ta,” sugyot ni Mario. “Gigutom na ko.”

“Ikaw na lay kaon,” giingnan ko siya.

“Naniudto na ko sa wa pa ko mogikan didto sa balay.”

 “Order lang gud bisa’g unsa aron di sab ko laayon nga magkaon nga mag-inusara.”

   “Okey, congee na lay ako.”

Si Mario maoy nangunay pag-order sa among pagkaon. Dihang naka-order na siya. Nangaon dayon mi.

 “Di ko magdugay sa pagpakigsulti nimo,” giingnan ko si Mario human sa among pangaon. “Unsay gusto mo nga atong panagsultihan.”

“A-ng bahin natong duha,” laktod nga tubag ni Mario.

“Nga-ngano man diay?”

“Gusto kong masayod kun unsa nay akong papel sa imong kinabuhi human niadtong nahitabo nato.”

“U-unsa?”

“Tug-ani ko sa tinuod, Phoebe.” -- Sumpayan pa