Ang hinungdan sa gibating kabalaka ug kabalisa ni Abigail mao nga nasayod siyang nagselos si Michael kang Harvey. Tingalig wala motuo si Michael sa iyang gisulti maong nakigkomprontasyon gayod kini kang Harvey.
Misantop sa hunahuna ni Abigail nga posibleng nasayod na si Harvey nga nangulitawo si Michael kaniya. Hayan gisultihan na ni Michael si Harvey mahitungod sa pagpanguyab niini kaniya.
Hugot ang pagtuo ni Abigail nga siya gyud ang gipanagsultihan nila ni Harvey ug Michael. Ang iyang gikabalak-an mao nga basin og dili magkasinabot ang duha. Si Michael ra ba seloso nga wala sa hustong lugar.
Sa laing bahin hinuon, nareyalisar ni Abigail nga angay niyang ikalipay kun nasayod na si Harvey bahin sa pagpangulitawo ni Michael kaniya. Bisan og wala niya sugta si Michael pero kun nasayod na si Harvey sa pagpanguyab niini kaniya, gusto niyang makita ang reaksiyon sa ulitawo.
Gusto niyang masuya si Harvey bisan dili niya uyab si Michael. Sa ingon, makabalos siya’g gamay kang Harvey tungod sa pagpakigsuod niini kang Krista -- kun dili man tinuod nga may relasyon sila!
Gisakitan man gud si Abigail nga wala gayod magtagad si Harvey sa iyang gibati ngadto niini. Hinuon, gitago niya ang iyang gugma alang kang Harvey. Pero wala na lang unta makigsuod si Harvey ngadto kang Krista aron dili madugangan ang iyang kahimangod ug kasakit.
Pagkapalis, paggawas ni Abigail sa klase niya sa iyang major subject, midiretso siya sa library aron magpa-xerox sa libro sa iyang klasmet nga maoy gikuhaan sa gi-lecture sa ilang magtutudlo.
Apan pag-abot niya sa library, iyang natukmaan nga nagpunsisok ang mga estudyante nga nag-alirong sa nahimutangan sa xerox machine. Mibiya na lang siya sa library. Migawas siya sa school campus aron adto magpa-xerox sa gawas sa eskuylahan.
Dunay tindahan sa atbang sa eskuylahan nga nagtanyag og serbisyo sa xerox copying. Didto mopaingon si Abigail. Magpa-xerox siya sa librong iyang dala. Ubay-ubay gyud ang mga panid niini nga iyang gipakopyahan.
Wala pa siya makahuman sa pagpaseroks, nakugang siya dihang kalit siyang giduol sa usa ka lalaki. Si Michael.
“Kaganina ra kong nangita nimo,” ni Michael pa. “Nia ka ra man diay dinhi.”
“Nganong nangita ka man nako?” Pangutana ni Abigail.
“May importante kong tuyo nimo,” tubag sa ulitawo. -- Sumpayan pa