Ulipon sa gugma

Gula 17

Wala dayon motubag si Abigail sa pangutana ni Krista. Gitutokan niya ang dalaga. Nakasabot si Abigail nga daw nagselos si Krista sa pagpakigkita ni Harvey kaniya. In love gyud tingali si Krista kang Harvey.

“Tubaga ang akong pangutana, Abigail,” nagkanayon si Krista. “Unsay tuyo ni Harvey kanimo nga miadto man siya sa imong gipuy-an kagabii?”

“Well, dili kaayo importante ang iyang tuyo,” tubag ni Abigail. “Igo lang siyang nangumosta nako.”

“Ingon ka ba gayod diay niana ka importante alang kang Harvey?”

“A-ambot lang. Basta kay mao ra kanay iyang tuyo nako. Dili man sab tingali daotan kun bisitahan ko ni Harvey? Managhigala man mi.”

“Tinuod kana. Pero di ba giingnan ko na man ikaw nga likayan mo si Harvey tungod kay ako lang siya ug wa nay laing makatag-iya kaniya?”

“Naglikay man bitaw ko niya. Pero siya man ang miadto sa akong gipuy-an. Sala diay na nako? Gawas pa, gisundan mo man kaha siyang mipaingon sa akong boarding house? Nganong wala ka man molahos og sulod aron kita untang tulo ang magsultihanay? Sa ingon, dili ka na magduda.”

“Mao gyud unta kanay akong buhaton. Pero nagpugong lang ko kay basin og makahimo ko’g eskandalo ug ma-turn-off na hinuon si Harvey nako. Pero sa sunod higayon, mao na kanay akong buhaton.”

“Imo kanang katungod, Krista. May katungod ka sa pagsunodsunod kang Harvey aron imong masayran ang tanan niyang binuhatan. Tinuod man kaha nga may relasyon mo?”

“Nganong nakapangutana ka man og ingon niana?”

“Just asking, Miss Krista. Ug kun wa ka nay laing tuyo nako, biyaan ko na ikaw. Okey?”

Wala motingog si Krista. Dihadiha mitindog si Abigail ug migawas sa canteen. Milahos siya ngadto sa library aron magtuon.

Apan sa iyang pagsulod, kalit lang napahunong paglakaw si Abigail. Nasigpatan dayon niya didto sa sulod sa library sila si Harvey ug Michael nga seryosong nagkulukabildo.

Midali si Abigail pagsibog samtang wala pa sila makakita kaniya. Mibalik siya sa iyang agi. Gilubok sa kakulba ang iyang dughan. Unsa man kahay gipanagsultihan nila ni Harvey ug Michael? Nakapangutana siya sa iyang kaugalingon sa hilom.

Mibati si Abigail og kabalaka sa iyang nakita didto sa library. Nabalisa siya pag-ayo. -- Sumpayan pa