Gula 14
Mibatig kalagot si Abigail sa presensiya ni Michael. Nasayod na siya sa tuyo niini kaniya. Ug alang niya, makadisturbo kini sa iyang pagtuon sa iyang mga leksiyon sulod sa library.
“Nasayod kong may importante kang buhaton, Abigail,” nagkanayon si Michael. “Pero mohangyo lang ko nimo’g mubong panahon sa pagpakigsulti nimo. Duna lang koy gustong masayran.”
“Unsa kana, Michael?” Gisukit niya ang ulitawo.
“Bahin ninyo ni Harvey.”
“H-ha? Kay ngano man diay?”
“Nakita ko kamo kaganina nga misulod sa usa ka snack bar.”
“Diay ba? Aw, dili man tingali daotan kun makigkuyog ko niya?”
“Dili daotan alang nimo, Abigail. Pero gisakitan ko sa akong nakita.”
“Unsa?” Nagselos ka ba?”
“Tingali.”
Wala motingog si Abigail. Gitutokan niya si Michael.
“Si Harvey ba diay ang hinungdan kun nganong hangtod karon wala pa gyud nimo dawata ang akong gugma, Abigail?” Nangutana si Michael.
“Nasayop ka, Michael,” tubag ni Abigail. “Managhigala lang kami si Harvey. Si Krista ang girlfriend ni Harvey busa dili ka angay magselos kaniya.”
Milungtad og pipila ka gutlo ang panagsulti nila ni Abigail ug Michael. Human mapasabot ni Abigail ang ulitawo sa tanan, mibiya na kini sa iyang nahimutangan. Migawas si Michael sa library.
Misugod dayon si Abigail pagtuon sa iyang mga leksiyon. Iyang gi-review ang iyang notes. Gibasa kini niya’g maayo.
Apan mora’g gisungog si Abigail sa demonyo. Kay wala madugay sa iyang pagtuon sa iyang leksiyon, miabot si Krista ug nakigsulti kaniya.
“Kamo na diay si Michael ang mag-on karon?” Pangutana ni Krista.
“U-unsa?” Nakugang si Abigail sa pangutana sa dalaga.
“Nakakita baya ko ninyo. Sweet kaayo mong tan-awon nga nagsultihanay kaganina. Sa akong tan-aw, pareson gyud mo.”
“Wa mi relasyon si Michael, Krista. Wa...!”
Ug gibiyaan ni Abigail si Krista sulod sa library.
Nianang pagkagabii, samtang nagtuon si Abigail sulod sa iyang lawak sa boarding house, gipahibalo siya ni Vonna nga may bisita siya. Si Harvey. -- Sumpayan pa