Ayay..! Padre...!, ayayyy...! nagpanyagit sa kasakit ang Periko nga giibtag mga balhibo sa iyang ulo. Giupawan siya sa iyang agawon nga si Padre Damoslo, tungod sa sala nga nabuhat niini. Maoy gikalagutan ni Padre Damoslo ang sipat niyang Periko nga maoy responsable kun nganong nidako ang iyang utang sa suki niyang food chain, nga orderanan niya og pagkaon.
Gisundog sa Periko ang tingog sa iyang agalon, nga si Padre Damoslo. Kay sa panahon nga wala ang pari sa kombinto, mag buot-buot kini’g panawag sa telepono ngadto sa suking food chain aron magpa-deliver og mga lamiang pagkaon.
Dili katuo si Padre sa kadako na sa iyang utang sa suki niyang food chain sud lang sa usa ka semana. Maong sa kalagot niya, iya kining giupawan. Ug didto sa dakong halwa, nagpaminti sa kalagot ang sipat nga Periko ngadto sa iyang agawong pari.
Gusto siyang makabalos sa iyang amo tungod sa iyang gidangatan.
Pagka buntag sayo, nagmisa si Padre Damoslo. Ug sa gihambing panimalos sa Periko, dali kining nilupad ug nitago sa luyong bahin sa rebolto sa Ginoo nga nagdupa sa dakong krus. Way bisan unsang nakabantay sa iyang giloklukan.
"Ang Ginoo ma-anaa kaninyo," ni padre nga padayon sa pag-misa. "Ma-anaa usab kanimo," sa mga manimbahay.
Pagka-taudtaod kalit may bugnaw'ng tingog nga nag gikan sa rebolto sa Ginoo nga nagdupa sa krus. "Padreee ... padreeee ... paminaw kamooo..." kahikurat ni Padre Damoslo nga nakabati sa bugnaw'ng tingog nga gikan sa rebolto sa Ginoo.
"Ohhh ... lord ... ka-kahibulongan, ang Ginoo nisulti," ni Padre Damoslo.
Dali niyang gisinyasan ang mga manimbahay sa pagpanluhod. Ug dali usab siyang niluhod atubangan sa rebolto sa Ginoo.
Naghangad kini sa rebolto ug piniyong ang duha ka mga mata.
"Padre ... padre ... paminaw kamo. Kinahanglang mangandam kamo para sa inyong kaluwasan ... kay adunay dakong katalagman nga moabot sa inyong dapit," sa bugnaw'ng tingog.
"Ginoo ko...! u-ug ... unsay among buhaton Ginoo? Sultii kami Ginoo," ni Padre nga nagpangurog.
"Kinahanglan nga magpa-upaw kamong tanan ... kay mao kini ang kasiguroan sa inyong kaluwasan...," panapos nga mga pulong gikan sa rebolto.
Daling nag-karaka si Padre nga ni-atubang sa manimbahay. "Mga kaigsuonan ko ... nabati ninyo ang akong nabati? Kinahanglan magpa-upaw kitang tanan para sa atong kaluwasan."
Daling nag-inupaway ang tanang tawo sulod sa simbahan. Hasta ang mga sakristan ug si Padre nag-inupaway sab sa ilang mga ulo.
Pagkahuman nilag upaw, nibalik og atubang si Padre sa rebolto sa Ginoo nga pina-isa ang duha ka mga kamot ug ning higayona usa na ka dakong opaw.
"Oh... Ginoo ... natuman na ang imong pagbuot ... upaw na kaming tanan. Siguro naba kami sa among kaluwasan Ginoo?" sa pare nga nangayupo sa Ginoo. Apan wala nay bugnaw'ng tingog nga nitubag sa pari. Ug kalit may ni-kapakapa sa likod sa rebolto sa Ginoo ug daling nisakdap sa atubangan ni Padre Damoslo.
"Ha...!ha...!ha..! pikat nimo Padre..! nakabawos nako nimo...! Pareha nata pulos opaw..!" sa Periko nga nibuhakhak ug daling lupad pagawas sa simbahan.
Garabing kalagot ni Padre Damoslo nga nagpangawot sa opaw na niyang ulo. Naka-pamalikas kini sa kalagot. Ang iyang binuhing Periko diay nga iyang giupawan maoy tag-iya sa bugnaw'ng tingog nga nagpa-ginoo-ginoo luyo sa rebolto.
Ug sa atubangan sa pari, arang isoga sa mga manimbahay nga nagpanudlo kaniya nga pulos na mga opaw. (Kataposan)