Ulipon sa Gugma

Pagkasunod adlaw, sa pagsulod ni Abigail sa school campus, gisugat siya ni Vonna. May mahinungdanon kining tuyo kaniya. Wala dayon motug-an si Vonna sa tuyo niini. Gidala siya niini ngadto sa SSGO office.

“Unsa bay gusto nimong isulti nako?” Gipangutana ni Abigail si Vonna dihang nakapahimutang na sila sa pagpanglingkod sulod sa SSGO office.

“Wa ka pa ba masayod bahin sa nabaniog nga balita karon sulod sa school campus?” Gisumbalik og pangutana ni Vonna si Abigail.

“Bahin sa unsa?” Sukit ni Abigail.

“Bahin nila ni Harvey ug Krista?” Laktod nga tubag ni Vonna.

“U-unsa? K-kay ngano man diay?”

“Sila na man kuno karon ang mag-on.”

“H-ha?”

“Mao kanay isyu nga mikatap karon sa school campus. Si Krista mismo ang nagpakaylap sa maong balita.”

“D-diay ba? Aw, tinuod tingali kay si Krista man kaha mismo ang nanabi.”

“Mao lagi. Hasta man gani ko gisultihan sab niya.”

“Pareson man sab sila. Guwapo si Harvey. Guwapa sab si Krista. Angay gyud sila sa usag-usa.”

“Moingon ka lang ana?”

“Unsa man diay ang angay kong isulti?”

“Di ba suod man mo ni Harvey?”

“Oo. Ngano man diay?”

“Nakamatikod ka ba nga nanguyab si Harvey kang Krista?”

“Ambot lang. Wa ko masayod niana. Aw, nakakita ko nila nga kanunay magkuyog. Pero wa ko magsusi kun unsay real score bahin nila. Managhigala lang mi si Harvey. Ug nasayod ko sa akong limitations. Kay ngano man diay?”

“Kuan man gud, Day. Para nako, dili pareson sila si Harvey ug Krista.”

“U-unsa?”

“Mao kana. Buotan si Harvey. Samtang si Krista, nagbahil lang ang dagway nianang babayhana. Flirt nga dako.”

“Wa tay mahimo ana, Vonna. Unsaon ta man kun nagkahigugmaay sila.

Human sa panagsulti nila ni Vonna, si Abigail midali pagpaingon sa comfort room. Didto mihilak siya taman sa ginhawa. -- Sumpayan pa