Gula 10
Nakadayeg si Abigail sa kaprangka ni Krista. Tiaw ba nga mikompisal man kini sa iyang atubangan nga dako kini’g gusto kang Harvey?
Hinuon, bisan pag wala mopadayag sa pagtug-an si Krista kaniya mahitungod sa tinud-anay nga gibati niini ngadto kang Harvey, si Abigail nasayod nang nakagusto gayod kini ngadto sa ulitawo.
Maila ug masabot kaayo kini pinaagi sa lihok ug sinultihan ni Krista nga dako gayod kini’g gusto kang Harvey.
Pero siya kaha? Maila usab kaha sa iyang lihok ug sinultihan nga nahigugma siya kang Harvey? Nakasabot kaha usab si Krista nga may gusto siya kang Harvey?
Apan lahi ang gihimo ni Krista kay sa iyang gibuhat. Si Krista dayag nga nagpakita pinaagi sa lihok ug sinultihan nga nakagusto kini kang Harvey. Samtang si Abigail naningkamot pagtago sa iyang gibati ngadto sa ulitawo.
“Nagkasinabot na ba kita, Abigail?” Misukna si Krista kaniya.
Wala motubag si Abigail. Gitutokan niya si Krista.
“Kun nagtinguha ka nga magkarelasyon kamo si Harvey,” ni Krista pa. “Ayaw na lang kana ipadayon tungod kay dili ug dili gyud ko makatugot nga maangkon siya sa laing babaye. Busa, likayi siya, Abigail.”
“Nasayop man tingali ka, Miss Krista,” nagkanayon si Abigail. “I think you’re barking at the wrong tree.”
“Unsay buot mong ipasabot?”
“Wa may nangilog ni Harvey gikan nimo. Kun nabalaka ka nga nagtinguha ko sa pagpakigrelasyon kaniya, nasayop ka. Isipon ko pa ganing dakong utang kabubut-on nimo kun makombinser mo siyang dili na magpaduol nako.”
“A-Abigail...” Daw nanglipaghong si Krista.
“Dili ko interesado ni Harvey,” pintok nga sinultihan ni Abigail. “Ang nakadaot nimo kay nagpataka ka lang og banghag. Pataka ka lang og pamasangil. Kun interesado ka kang Harvey, pwes, imo na siya.”
Wala na magtingog si Krista.
“Nagkasinabot na tingali kita, Miss Krista,” gikan ni Abigail. “Hinaot nga dili ka magbaton og daotang hunahuna para nako.”
Unya migawas na si Abigail sa kan-anan. Nahibilin si Krista sa sulod nga naghinuktok, daw wala sa kaugalingon samtang nagpabiling naglingkod. -- Sumpayan pa