Ulipon sa gugma

Gula 9

Nakahukom si Abigail nga pakigsultihan si Krista. Mas maayong masayran niya ang tuyo niini kaniya. Importante man kuno kaayo. Gusto niyang sutaon kun tinuod ba gayod nga importante ang buot niining pakigsultihan kaniya.

Misulod sila sa Casserole, usa ka luhong kan-anan nga nahimutang sulod ra usab sa Gaisano. Sa nasuok nga bahin sulod sa kan-anan dihay bakanteng lamesa ug mga lingkoranan. Nanglingkod sila. Pero ang usag-usa kanila mora’g parehong walay planong mo-order og pagkaon.

“Unsay atong panagsultihan?” Si Abigail ang mibukas sa ilang panagsulti dihang nakapahimutang na sila.

“Bahin kang Harvey,” tul-id nga tubag niKrista.

“Ngano man diay ang bahin niya?”

“Nakamatikod ko nga ingon sa close kaayo mo?”

“Dili man tingali ingon niana ang among estado. Managhigala sab mi. Pero dili ingon niana kahugot ang among bonding. Gawas pa, dili angay ikahibulong kun makigsuod si Harvey nako. Hingamigohon si Harvey.”

“Pero unsa ba gyuy gipakaon mo kaniya nga daw gusto man gyud siyang modikit nimo? Mora’g espesyal ka para kaniya. Mora’g okey lang niya kun mawala kaniya ang tanan basta dili lang ikaw.”

“Dili man tingali ingon niana si Harvey. Kinsa man ko nga hatagan niya’g dakong pagtagad?” Sa tanan niyang mga higala, mora’g ako ra tingali ang low profile ug dili niya ikapasigarbo. Ako ra tingali way nahot.”

“Tingalig nagpa-charming ka sab niya maong na-attract sab siya nimo?”

“U-unsa?”

“Di na lang ta magminaot, Abigail. Nasayod kong interesado ka kang Harvey.”

“Hey, Miss Krista. Unsa gud kanang gipanulti mo?”

“Nasayod kong nakasabot ka sa gusto kong ipasabot. Dili ka angay kaniya, Abigail. Busa gusto kong likayan mo na siya.”

Wala makatingog si Abigail. Igo lang siyang nitutok kang Krista.

“Dako kaayo ko’g gusto kang Harvey, Abigail,” nagkanayon si Krista. “Ug dili ko buot nga laing babaye ang makatag-iya sa iyang gugma. Busa ayaw gayod paghimo’g lakang nga mailog mo siya gikan kanako kun dili ka gustong magubot ang imong kinabuhi!” -- Sumpayan pa