Ulipon sa gugma

Gula 8

“Dili mahimo, Day,” giingnan siya ni Vonna. “Gisultihan na to nako si Michael nga nagmata ka pa.”

Miginhawag lawom si Abigail. Wala siya’y kadasig nga moatubang kang Michael. Alang niya, nakasamok si Michael sa iyang kinabuhi.

Wala siya makagusto kang Michael. Wala siya mahigugma niini. Ang iya untang gihigugma mao si Harvey!

“Atubanga lang gud si Michael, Day,” nagkanayon si Vonna. “Pakigsultihi bisan makadiyot lang.”

“Gihasolan na ko’g maayo sa kanunay niyang pag-anhi dinhi aron mamisita nako, Day,” padayag ni Abigail.

“Pwes, prangkahi siya. Daygi nga wa ka mahigugma niya aron dili magsalig nga may mapaabot ug malaoman siya gikan nimo.”

“Ako na man bitaw kanang gibuhat pero wa man gyud siya mopatuo. Nagsige man lang gihapon siya’g balik-balik dinhi.”

“Ingon ana man gyud nang mga palikero, dili daling mosurender.”

Wala motingog si Abigail.

“Lakaw na,” apura ni Vonna. “Nagpaabot siya nimo sa sala.”

“Ikaw lay atubang niya, Day,” giingnan ni Abigail si Vonna.

“Naunsa ka diha? Ikaw maoy iyang tuyo unya akoy imong paatubangon? Bahala pud uroy.”

Wala na sab makatingog si Abigail.

“Pakigsultihi lang gud siya, Day,” gikan ni Vonna. “Pasabta’g maayo aron di na siya magbalik-balik.”

Napugos gayod si Abigail sa pagpakigsulti kang Michael. Girespetahan lang niya ang ulitawo bisan wala siya sa mood sa pagpakigsulti niini.

Pagkaugma, human sa ikaduhang klase ni Abigail sa iyang major subject sa buntag, midalikyat siya’g adto sa Gaisano kay vacant period na man niya. Duna siya’y paliton nga gikinahanglan kaayo sa usa sa iyang mga subject.

Pagsulod ni Abigail sa main entrance sa Gaisano, midiretso siya ngadto sa school and office supplies department. Wala magdahom si Abigail nga magkabagat sila si Krista sulod sa maong department store.

“Mahimo bang magsulti ta?” Giingnan siya ni Krista.

“Nagdali ko,” balibad ni Abigail.

“Ayaw ko’g balibari,” may kasuko ang tingog ni Krista. “Importante kaayo ang akong tuyo nimo.” -- Sumpayan pa