Room for Rent

Bisan asa lang ang venus sa sugal nga mahjong ug tong-it. May mga higayon nga adto mi sa luyong bahin sa balay nilang Talino-Lupeng. Usahay adto sa ilang Panyo-Carmen. Unya, sa ilang Jonie-Agnes ug sa ilang Roger-Luz nga balay kami magsugal.

Gituyo namo nga dili magpermanente sa usa ka dapit sa among pagsugal aron paglipat sa mga mananakop. Usahay gud may mga polis ug barangay tanod nga mosurpresa pagtungha sa dapit nga among gipuy-an sa Mabolo aron pagsusi o pagpaniid kun wala bay nanggisugal.

Tungod sa kahanas nakong modula sa sugal, labina sa mahjong ug tong-it, kadali ra kong nailhan sa hut-ong sa mga sugarol sa Mabolo. Kadali ra kong nakabaton og daghang mga kaila ug higala.

Usa sa akong nakaila mao si Mario. Sugarol sab ning tawhana. Usa siya ka kawani sa usa ka buhatan sa gobiyerno. Bohemyo. Mahigalaon. Maila nga may pagka-playboy. Kuwartahan sab. Kaha, dako siya’g suweldo sa buhatan sa kagamhanan nga iyang gialagaran.

Nagkasuod kami si Mario. Kanunay man gud ming magkaatbang sa sugal. May mga higayon nga samtang naggunit mi og pitsas o baraha, magkasingkiay ang among mga tuhod sa ilawom sa lamesa. Usahay gani, magtuo kong tuyoon gyud ni Mario pagsaghid ang akong tuhod. Ug sa higayon nga magsingkiay ang among mga tuhod, mora ko’g nakuryentehan. Naay friction!

Abi ninyo, bisan minyo na ako apan ma-attract man lang gihapon ko’s laing lalaki. Ambot ba, uy! Dili man kini nako tuyoon. Pero madani ug ma-crush gyud ko sa usa ka lalaki nga smart ug may pleasing personality. Sama kang Mario!

Ang nakakulba-hinam sa sitwasyon namo ni Mario kay ingon sa nakagusto sab siya nako. Mora’g nadani sab siya sa akong beauty. Pun-an pa sa kanunay kong pagpa-charming niya sa higayon nga mag-atbang mi sa sugal, mao tingali nga gipormahan sab ko sa kanahan.

Usa niana ka higayon, human sa among pagsugal diin siya’y nakahipos og daku-dakong daog, misekreto siya’g duol nako ug may gihunghong.

“Magkita ta unya,” giingnan ko ni Mario.

“Asa man?” Gipangutana ko siya.

“Sa E-mall. Mga 3PM.”

Ambot kun nganong wala man ko maglangan pagpakanaog sa akong hukom. Misanong dayon ko sa pagdapit ni Mario. -- Sumpayan pa