Sukli sa utang

 Gula 263

Usa ka batang babaye ang kauban ni Ferdinand, si Joy. Iya kining gipaila kanako nga iyang anak sa laing babaye.

“Sa dihang akong nasabtan nga mora’g dili ka interesadong makabaton ta’g anak,” mipasabot si Ferdinand. “Nagpaanak ko’g laing babaye kay gusto man gyud kong makakita sa akong liwat. Siya unta ang atong sagopon kun misugot ka pa sa akong sugyot kaniadto nga managop ta.”

Pagkawala ko magdahom. Mi-boomerang diay kanako ang tanan kong daotang binuhatan. Tungod kay gi-abort nako ang anak namo ni Ferdinand nga akong gimabdos, nakigrelasyon siya sa laing babaye aron lang makakita siya sa iyang liwat. Kadako diay sa sayop nga akong nahimo!

“Amanos na ta, Editha,” ni Ferdinand pa. “Karon gusto kong ikaw mismo ang mag-atiman kang Joy. Ug ayaw gyud siya’g pasakiti kun di ka gusto nga masuko ko nimo.”

Wala koy laing nahimo gawas sa pagsanong sa kagustohan ni Ferdinand. Pilit kong motuman sa iyang gusto bisan sakit kini alang nako. Unsaon, ako man ang unang nakasala. Ug ako sab ang hinungdan nga nakasala si Ferdinand sa among kaminyoon. Ako gyud ang angay basolon kun nganong naingon niini ang mga panghitabo sa akong kinabuhi.

Mao diay nga dali rang nakadawat si Ferdinand sa akong pagluib niya. Mao diay nga wala siya magtinguha nga masilotan ko bugti sa akong paghugawhugaw sa among kaminyoon. Nakautang ko niya’g kasal-anan tungod sa akong kamaluibon nga asawa. Pero mao diay nga wala ko niya pasiloti sa balaod kay nagplano man diay siya nga iya kong suklian sa tanan kong daotang buhat nga gihimo ngadto kaniya. Ug si Joy, ang anak niya sa laing babaye, mao ang suki sa utang ko kaniya.

Pinaagi sa pag-alima nako kang Joy nga dili ko pursosong anak, gusto ni Ferdinand nga masinati sab nako ang kasakit sa iyang pagbudhi sa among kaminyoon, sama sa pagluib ko usab kaniya. Wala gyuy hiwi nga dili tugbangan og baliko. Ug kun ang utang pagabayran, may utang sab diay nga puyde rang suklian. Ug kini ang gibuhat ni Ferdinand nako.

Panahon nang masayran ni Ferdinand ang tanan bahin nako. Gitug-anan ko siya nga makadaghan na ko magmabdos sukad sa among panagtipon apan gi-abort ko kini tungod kay dili ko gusto’g gubin sa kinabuhi. Nakapasaylo si Ferdinand nako sa mao kong kasal-anan.

Milabay ang usa ka tuig. Nakabaton na gyud mi’g anak si Ferdinand. Gidala namo ang bata sa among pagbakasyon sa Bicol. -- Kataposan