Abi niya'g wa siya sugta

Nakahukom na lang si Milyo, nga mosurender na lang sa pagpanguyab kang Perla. Naupos na gud ang upat ka tikod sa iyang sapatos, sa way palta niyang pagpamisita sa dalaga.

Unsaon ... nga sa panahon nga atua siya sa panimalay ni Perla, mao ra man og kuwang sa pagtagad kaniya ang dalaga?

"Unsa may nahitabo kanimo Milyo, nga lupig pa may namatyan ka og iring?" ni Nanay pa niya Isyat nga mibati og kabalaka sa iyang anak.

"Kapoy na kaayo Nay Isyat ... og binalikbalik og pamisita sa pinuy-anan ni Perla" nagpangawot sa ulo si Milyo nga mitubag sa iyang inahan nga taudtaud na usab nga nabiyuda.

"Ug wa man gayo’y akoy maani!"

Walo ka buwan nga wa na gayod mopakita pa si Milyo, aron mamisita kang Perla. Hangtud nga nakahunahuna na lang siya nga mangulitawo kang Repsali, ang silingan nilang dalaga ning ilang dapit sa may barangay sa Pitalo.

"Sa una pa lang nga higayon Milyo, nga mipadayag ka sa imong tim-os nga gugma kanako ... mipitik dayon ang akong kasingkasing, nga angay kang mahalon ug higugmaon!" dihay kalarino sa pulong nga nalitok sa ngabil ni Repsali.

"Salamat kaayo Repsali, nga gidawat mo ang akong gugma!" ni Milyo pa nga hinay niyang gipisil ang malumoy nga tudlo ni Repsali.

Gikatakda ang adlaw nga Sabado, diin hiusahon ang talikala sa kaminyoon ni Milyo ug Repsali, ning ilang dakong simbahan sa lungsod sa San Fernando.

"Magpakamatay gayod ako Milyo, kun ihinayon ang inyong kasal, karong umaabot nga adlaw'ng Sabado!" kalit lang mibutho sa ilang balay ni Milyo si Perla nga naghilak.

"Nganong magpakamatay ka man ... nga kun buot hunahunaon dili man kita uyab? Wa man gani ko nimo sugta?" ni Milyo pa nga nagka-bunga-bunga ang tuno sa tinubagan.

"Wa mo lang ako hisabti Milyo, sa akong linihokan, kay ang tinuod ... gihigugma ko man ikaw!" giumod ni Perla ang iyang nawong ngadto sa dughan ni Milyo ug dihay iyang gihagawhaw nga nagkanayon.

"Sayang kining gugmaha ... Milyo ... nga wa lang nimo masabti ang tinuod kong gibati, diin adto ka na lang sa sabakan ni Repsali, nga magpauraray! Sayang ang tanan nga dili ko ikaw maangkon!"

Dihay gihagawhaw ni Milyo sa hilom diin siya nagkanayon "gipakaingon ko man gud Perla ... kun wa ako nimo sugta!" (Kataposan)