Desisyon

Kalit nga nawad-an ko’g gana sa pagkaon sa among dinner ni Raul sa Chowking. Wa ko magdahom nga ang iyang tuyo nako mao ba diay pagpangayo sa akong pag-uyon sa iyang gusto.

"Look, Aurora. Husto na ta sa edad. Nganong di pa man ta magminyo?"

Nakapanglingo ko nga mitan-aw sa akong boyfriend.

"Nasayod ka sa rason, Raul, nganong di pa ko gustong magminyo ta. Yes. Sakto na ta sa edad. May trabaho na sab ta. Apan may gigastohan pa kong manghod."

"Usa ka tuig na lang bitaw makahuman na siya sa college. Mahimo na tang magminyo. Di ka nako pugngan sa pagpadayon og gasto sa imong igsoon."

Seryoso kaayo si Raul. Nakita ko kini sa iyang nawong. Usa ka tuig na ang among relasyon. Nagkaila ug nagkatrato kami sa nagtungha pa kami sa college. Nakahuman na ko sa commerce ug nagtrabaho na sa usa ka banko sa siyudad. Engineer na sab si Raul ug maayog trabaho sa usa ka construction firm.

"Maghuwat lang god ta nga makahuman na gyod ang akong manghod. Unsa may imong kabalak-an?"

"Gimahal tika, Aurora. Basig mawala ka nako. Nasayod ko nga nagpadayon sa pagpangulitawo nimo si Geron."

"Wa ka ba diay pagsalig nako, Raul?" Hilom kong naglagot sa akong boyfriend. Karibal niya si Geron sa pagpaninguha nako. Tinuod nga nagsige gihapon sa pagpangulitawo nako si Geron. Apan wa ko’y gugma kaniya."

"Ikaw ang akong gisugot, Raul, kay ikaw ang akong love. Wa kay angay kabalak-an. Ikaw lang ang bugtong lalaki nga akong higugmaon."

"Ipakita kana nako, Aurora. Imatuod nako nga love mo gyod ako pinaagi sa pagpakasal nako."

"Magpakasal lagi ko nimo apan di pa karon, Raul." Hapit di ko na mapugngan ang akong kaugalingon sa kalagot.

"Huwaton ko ang imong tawag sa selpon ugma, Aurora. Kinahanglang modesisyon ka. Kun wa koy tawag nga madawat gikan nimo hangtod ugma sa tungang gabii, isipon ko nga wa kay gugma nako."

Naglibog ko. Nahasol ko sa desisyon nga gipangayo ni Raul nako. Nawad-an ko’g kadasig tibuok adlaw nianang pagka ugma. Gamay ra ang akong gikaon sa panihapon ug misulod dayon ko sa akong lawak. Gihunahuna ko pag-ayo ang gusto ni Raul ug ang akong gisaad sa namatay kong amahan nga pahumanon ko sa pagpaeskuyla ang akong manghod sa college una pa ko magminyo.

Duha ra kaming magsoon. Duha na ka tuig nga namatay sa car accident ang akong amahan, ug usa ka paralitiko ang akong inahan kay giatake sa kasingkasing. Maayo gani kay sa pagkamatay ni papa aduna na koy maayong trabaho sa banko.

Gitan-aw ko ang akong selpon. Hapit na magtungang gabii. Samtang nagdis-og ang mga gutlo, nagkakusog sab ang kakulba nga akong gibati. Nahadlok ba ko nga mawala si Raul nako? Apan unsaon na man lang ang gisaad ko sa akong amahan?

Sakit ang nakab-ot kong desisyon. Mingaw na kaayo ang tibuok namong balay. Ako na lang tingali ang nagmata. Kinsay makatulog? Kinahanglang mopakanaog ko’g desisyon.

Unya, miabot ang tungang gabii. Dugay kong gitutokan ang akong selpon. Nasayod ako nga naghulat si Raul sa akong tawag. Oo, naghulat siya.

Miginhawa ko’g lawom. Unya gipatong ko ang akong selpon sa pasistor nga diha sa kilid sa akong kama. Samtang sa akong mga mata, naglumba sa pagpangambak ang akong mga luha. (Kataposan)