Ang panimawos ni Amanda Marina

Dinhi sa merkado sa lungsod mao ray gisumsoman ang tabitabi bahin kang Amanda Marina nga anak sa magtiayong Antonio-Dionisia. Ang nahitabo kang Amanda Marina nga gitabangan kuno’g lugos sa upat ka tawo nga mikalit la’g saka sa ilang balay usa ka gabii niana.

Gawas nga gipatay ang iyang mga ginikanan nga sila si Antonio ug si Dionisia, nakadala pa gyud og mga alahas ug daghang kuwarta ang mga lampingasan nga mga tulisan.

Ug sa nahitabo ni Amanda Marina mora’g naapektohan ang iyang utok, kay dili na man kini magtagadtagad sa iyang panglawas. Dunay nakakita kaniya nga lago ug wala nay panudlay ang dalaga ug kanunay na lang kunong magtuk-ong sa ilang pantaw.

Ang iyang hinigugma nga si Bartoloy mao na lay miatiman niini ug mao nay nangabaga sa galastohan sa higayon nga ipahiling kini ni Bartoloy sa higala niyang doktor nga epesyalista sa pangisip.

Ug ang higala ni Bartoloy nga doktor mohinay lang sa pag-ingon, “Bartoloy, tungod sa nahitabo kaniya nga gitabangan siya’g lugos, duna siya’y trauma nga maoy sagad bation sa babayeng biktima sa lugos...”

Nianang gabhiona naghinuktok si Bartoloy. Giduol siya sa iyang inahan. Ug may gisulti nga nakapahimo nilang lalis.

“Bartoloy, suheto ko sa kaliwat nila ni Antonio ug Dionisia kay silingan mi kaniadto, kaliwat tawon na sila’g ungo, uy, Undo,” mipasabot si Nang Garita ngadto sa anak. Apan ingon sa naglagot hinuon si Bartoloy.

“Ayaw na lang og panghilabot bahin ini, Nay, kay ako ning problema. Mahal ko si Amanda. Nagkahigugmaay mi dugay na. Ug ning iyang sitwasyon karon, unongan ko siya, Nay, bahala’g unsay ikasulti sa atong mga silingan dinhi ug ingon man sa atong mga paryente,” ug milakaw dayon si Bartoloy.

Sa usa ka karinderya sa lungsod nag-inom ang upat ka mga bugoy nga sila si Andres, Pistoy, Ben ug Fredo. Samtang sila nag-inom may gisulti si Andres sa iyang mga kabarkada ug matud pa niya: “Ang kuyaw ini kon maulian kana si Marina ug isumbong ta nga kitay nanulis ug unya mipatay sa iyang mga ginikanan ug unya milugos kaniya, na, impas gyud ta!”

“Sayon ra na,” ni Ben pa. “Adtoon nato siya karong gabii ug atong tiwasan, aron wa na tay problema...”

Pagka-gabii ilang giadto ang balay nila ni Amanda Marina ug silang upat nahaatras kay maoy ilang nakita si Amanda Marina nga nanaog sa silong nga way sapot ug hubo ang lawas niini. Miamag ang kaputi ni Amanda Marina nga naigo sa kahayag sa buwan.

“Unsa man, wa pa mo matagbaw nako, inyo man kong gibalikan, he,he,he,he, maayo hinuon, aron magduwa ta dinhi sa balay. Dali mo diri sa taas, sunod mo nako,” ug milakaw si Amanda Marina balik sa taas.

“Mga parts, kakita mo, kaanindot sa lawas ni Amanda Marina nga way bisa’g salimbong na lang. Wow, higayon na ni nato, ato siyang usban ug unya patyon na gyud nato, tana manaka na ta mga parts,” nagtingsi si Andres nga nag-una sa pagsaka sa taas sa balay. Unya, wa dangtig dugay mao na lay mabati ang ilang mga tingog nga nagping-it sa kasakit.

“Ayaaaayyy! Ayawwwwww!! maluoy ka namo, Amanda Marina, aaaaaaaaahhhhhhhh!! Eeeeeeeee!” nagkapaas ang ilang mga tingog. Ug unya nahilom.

Pagka buntag sayo maoy nakita ni Bartoloy diha sa tugkaran nila ni Marina ang patay’ng lawas sa upat ka mga bugoy. Gipangita ni Bartoloy si Amanda apan wa na niya kini makita. (Kataposan)