Gula 252
Naghinuktok ko sa makadiyot. Akong gitimbangtimbang ang gisulti ni Celso. Wala koy ideya kun unsay iyang pakigsultihan nako didto sa balay nga akong gipuy-an sa Tambo. Mora’g importante gyud tingali kini kaayo. Ug tingali, may pagka-confidential sab ang butang nga among panagsultihan. Seryoso tingali kaayo ang topic.
“Bahin sa unsa man diay ang imong tuyo nako?” Gipangutana ko siya.
“Personal,” maoy iyang tubag; “Di mahimong hisgotan ta kini nga may laing mga tawo nga makadungog.”
Wala ko motingog. Gihinuktokan nako ang iyang gisulti.
“Mosugot ka ba, Editha?” Gipangutana ko niya.
“A-ambot lang,” nako pa. “A-aw, i-ikaw ang bahala...”
Pasado alas singko sa hapon miabot ang bus nga among gisakyan sa Tambo. Una kong mikanaog kay kang Celso. Gikidhatan ko niya samtang gidiskarga ang akong mga bagahe sa konduktor.
Pagbiya sa bus sa akong tungod, miduol dayon ang mga paryente ni Ferdinand nga akong mga silingan nga nakamatikod sa akong pag-abot. Sila nay mipahimutang sa akong mga bagahe sa sulod sa balay. Pero si Nanay Isabel igo lang midungaw sa bentana gikan sa balay nga iyang gipuy-an, wala gyud mosugat sa akong pag-abot.
Nabibo ang balay gumikan sa mga paryente ni Ferdinand nga nangayo’g sinugatan. Gipanghatagan ko ang tanan-- kutob sa nisugat sa akong pag-abot. Ang duha ka manghod ni Ferdinand, sila si Toni ug Grace, mihangop sab sa akong pag-abot. Gihatagan ko sab sila’g sinugatan.
Taudtaod gayod nga naalegre ang balay. Dihay miboluntaryo paghikay og panihapon. Maayo hinuon kay gikapoy ko sa biyahe. Kay nagpangilat man nianang pagtikyop sa kangitngit, ang uban nag-ulos sa pagpamauli. Pero may nahibilin gyud nga nakigdungan og panihapon nako, daw wala mabalaka nga maabtan sa nagsingabot nga ulan.
Igo lang ming nahuman og panihapon mihuros ang kusog nga hangin, timaan nga kaulanon gyud. Nagdali-dali sa pagpamauli sa tagsatagsa nila ka panimalay ang mga paryente sa akong bana samtang wala pa makabundak sa hingpit ang ulan. Gisirad-an nako ang front door sa balay.
Mikalit lang paghugpa ang kamingaw sa sulod sa balay dihang nakabiya na ang mga paryente ni Ferdinand nga misugat sa akong pag-abot gikan sa Manila. Wala madugay, mibundak ang kusog nga ulan.
Taliwala sa makusog nga bunok sa ulan, may nanuktok sa pultahan sa balay. -- Sumpayan pa