Gula 90
Nalipay pag-ayo si Fernan, ang lider sa mga vigilante, nga milampos na gayod ako sa hingpit sa pagpanimalos sa mga tawo nga nakasala kanako.
Nianang pagkagabii, nanglugsong mi sa kinapusoran sa siyudad sa Obic. Nagpa-book mi sa function room sa usa ka inilang kan-anan sa siyudad. Didto among giselebrar ang kalamposan nga akong naangkon.
Si Fernan ang miabaga sa tanang galastohan. Alang niya, ang akong kalamposan sa pagpanimalos kang Sheldon ug mga barkada iya sab nga kalamposan. Dako gyud ko’g utang kabubut-on kang Fernan ug sa iyang mga sakop nga vigilante nga mitabang sab nako.
Sa usa ka lamesa sulod sa function room, kami ray nag-okupar si Fernan ug si Keith. Sa laing lamesa maoy nag-okupar sila si Bredhart ug laing duha ka kauban. Ang ubang mga sakop ni Fernan maoy miokupar sa uban pang mga lamesa. Alegre mi sulod sa function room. Nag-videoke na ang uban nga nakainom na. Wala lang intawoy kasayoran ang tagdumala sa restaurant nga mga vigilante ang miokupar sa ilang function room!
“Unsay plano mo karon nga napatay mo na ang tanang mga tawo nga nakasala kanimo, Sandra?” Gipangutana ko ni Fernan taliwala sa kalangas sa iyang mga sakop nga nag-inom ug nag-videoke.
“Wa pa koy giplano nga bisan unsa, Fernan,” giingnan ko siya. “Sa pagkakaron, gusto kong magpabilin una uban ninyo.”
“Ikaw, Keith,” ni Fernan pa. “Unsay plano mo karon?”
“Wa pa sab ko masayod kun unsay angay kong buhaton,” maoy tubag ni Keith. “Kun di ninyo ikahasol, gusto sab unta ko nga magpabilin una uban kaninyo didto sa bukirang bahin sa siyudad sa Obic.”
“Welcome kamo kanunay didto sa akong panimalay sa bukid,” ni Fernan pa. “Ang ako lang gikabalak-an nga tingali’g maamong kamo ug mameligro uban kanamo sa umaabot nga mga adlaw!” -- Sumpayan pa