Ang gipili ni Fermin

Human sa among pagradwar ni Fermin sa hayskol sa among lungsod sa San Isidro, wa na kami magkita. May kawili akong naamgohan. Gimahal nako si Fermin. Buotan siya ug masinabuton.

"Tagaan natog higayon ang atong kaugalingon, Fermin, kun kita ba gyod."

Mao kini ang akong gisulti kaniya sa adlaw sa among gradwasyon. Nagkatrato kami sa pag-abot namo sa fourth year. Tulo silang nangulitawo nako, kay puyra buyag, guwapa sab ko ug nindot og lawas. Si Fermin ang akong gisugot kay siya ang akong love.

"Oo, Maricel. Batan-on pa kita. Wa pa kita makaseguro kun usa ba gyod ka tinuod nga gugma ang atong gibati sa usa’g usa."

"Salamat, Fermin, nga nakasabot ka. Di lang sab ta magteksanay ug magtawganay sa celpon. Gusto kong makahuman gyod og kurso. Kun kita gyud ang gitakdo sa kapalaran, only time can tell."

"Sige. Ug aron mahitabo kini, mag-ilis tag SIMPACK."

Mao kadto ang among gibuhat ni Fermin. Sa nag-eskuyla nako sa college, wa na ko makabalita kaniya. Namalhin na sab og puyo sila si Fermin. Sa Davao na sila namuyo kay nabalhin ang iyang amahan sa pagtrabaho didto kay nahimong branch manager sa kompaniya nga gialagaran.

Daghan ang nangulitawo nako. Wala mahanaw sa akong hunahuna si Fermin apan akong naamgohan nga dili diay dulot-sa-bukog ang love ko kaniya.

Si Manuel ang akong gihigugma. Usa sa mga naninguha sa akong gugma ug akong schoolmate sa unibersidad nga akong gieskuylahan. Guwapo sab siya sama kang Fermin. Nabatyagan ko nga bug-at ang feeling ko kaniya kay kang Fermin.

Nanglabay ang daghang mga adlaw. Nakahuman na kami si Manuel sa college. Pulos na kami adunay maayong trabaho. Misamot kalig-on ang among relasyon. Natugkad ko nga kami ang gitakda sa kapalaran. Ug si Fermin usa na lamang ka handomanan alang kanako. Tipik na lamang siya sa akong kinabuhi.

Naminyo kami si Manuel. Ug karon, lima na ang among anak. Usa ka higayon nga Domingo, nisimba ko sa simbahan sa Santo Rosario. Sa Don Pedro Cui kami namuyo si Manuel.

Nakalitan ko kay ang pari nga nagmisa mao man si Fermin. Usa na diay ka pari si Fermin? Pagkahuman sa misa, nakigsulti ko kaniya. Gitug-anan ko siya nga minyo na ako ug may mga anak.

"Natugkad ko sab, Mar, nga wa ko masayop sa destiny sa akong kinabuhi. Labaw nga nagkinahanglan ang Diyos nako."

Nakita ko nga malipayon si Fermin sa bokasyon nga iyang gipili.

"I'm happy nga malipayon ka karon, Fermin."

"Hasta sab ko, Mar. Sa akong nakita nimo, malipayon ka sa imong kinabuhi. Nanambok ka."

"Bitaw." Ug mikatawa ko. Nahimuot si Fermin ug mikatawa sab siya.

Mipauli ko nga gaan kaayo ang buot. Ug nasayod ko nga gaan sab ang paminaw ni Fermin sa iyang kaugalingon karon. Wa man tuod kami magkabulag, apan ang Diyos na ang nangitag paagi aron mahatagan og kalinaw ang tagsatagsa namo ka hunahuna. (Kataposan)