Nabuhian ni Sheldon ang armas nga iyang gigunitan. Nakita ko nga nagkadugo ang iyang pulsohan. Gitapin-an niya kini sa usa niya ka kamot. Maila nga hingigo kaayo ang nagpusil kang Sheldon.
Milingi-lingi ko sa palibot. Ug didto sa ibabaw sa panteyon nga may tulo na ka patong, nakita kong nagbarog si Bredhart nga naggunit og armas. Midali siya’g ambak gikan sa ibabaw sa panteyon ug mipaduol nako.
“Traydor ka, S-sandra,” ni Sheldon pa nga nagping-it gihapon sa kasakit. “Wa ko magdahom nga duna ka pa diay laing kauban.”
Wala ko motingog. Unya, misamot ang kakugang ni Sheldon dihang nanggawas gikan sa ilang gitagoan ang mga kauban ni Bredhart.
“Mga vigilante mi, Bay,” giingnan ni Bredhart si Sheldon. “Kontra namo ang mga abusado nga sama nimo maong gitabangan namo si Sandra.”
Unya gikuha ko ang armas nga gigunitan pa gihapon ni Bredhart. Dihang nagunitan ko na kini, gipunting ko kini sa agtang ni Sheldon.
“Dinhi sa kalibotan,” nako pa,” sa makauna ug sa makapabor lang. Ug karon nga mibalik pagpabor kanako ang kahigayonan, dili ko na gayod kini palabyon. Kataposan mo na, Sheldon!”
“A-ayaw....” morag mibati nag kalisang si Sheldon.
“Alang kang Orville nga imong gipatay didto sa Kilometro 35...!”
Bang! Naigo si Sheldon sa kinatung-an sa duha niya ka mata sa akong pagpusil. Natumba siya nga nagsiga ang mga mata.
Gipadul-an nako’g maayo si Sheldon nga naghayang sa yuta.
“Alang nako nga imong gilugos uban sa imong mga barkada...!”
Bang! Bang! Bang! Bang! Gipusil ko si Sheldon tumong sa iyang kinatawo. Pinaagi niini, gihingpit ko ang akong panimalos.
Wala madugay, nakabati mi’g tingog sa siren sa sakyanan sa kapolisan nga nagsingabot sa sam-ang. Midali mi pagbiya sa maong dapit aron makalikay sa mga tinugyanan sa balaod. -- Sumpayan pa