Kilometro 35

Gula 88

Nangandam ko. Nanukad ko’g maayo. Nasayod ko nga human sa pagkaigo ni Sheldon sa akong patid, naglungotlungot siyang makabalos. Nakaseguro kong nanginit na siya’g maayo gumikan sa tumang kalagot.

Mihata si Sheldon. Wala ko maglihok. Gibantayan ko lang ang iyang lihok. Mi-concentrate ko. Kinahanglang dili ko magpalipat. Dihang mihasmag siya, milikay ko. Pero dali rang nakabalik si Sheldon paatubang nako. Ug miatake siya. Giserad-an ko dayon siya sa hugot kong depensa.

Ug mao kadtoy sinugdanan sa among pagbayloay og atake ug pagtigi sa depensa. Atake-depensa ang among drama. Hangtod nga iya kong naapiki. Nalukapa ko dihang naigo ang akong tiyan sa iyang kinumo.

Apan mibangon dayon ko. Maantos ra nako ang kasakit nga akong gibati. Miharong ko ni Sheldon. Subli ming nagtigi sa kaabtik sa among mga kamot bahin sa mano-mano. Naglukso-lukso mi sa pagtaboktabok sa ibabaw sa lainlaing mga panteyon samtang walay puas ang among pag-atake sa usag-usa. Atake-depensa! Atake-depensa!

Hangtod nga nakakawat ko’g kahigayonan, nakalusot ang tuo kong kinumo ug maoy nakasabak niini ang baba ni Sheldon. Mora siya’g milupad ug unya mihagsa didto sa ubos sa panteyon. Miping-it siya sa kasakit. Nagkadugo na ang iyang baba ug kini hilom kong gikalipay.

Apan dihang mibangon si Sheldon, naggunit na og armas ang tuo niyang kamot. Ang iyang armas nga nalagpot kaganina diha ra diay sa duol sa iyang nahagbaan. Ug nakuha niya kini pagbalik.

“Nalingaw ko sa imong pasundayag, Sandra,” ni Sheldon pa nga mition kanako sa iyang armas. “Nakadayeg ko sa imong abilidad sa mano-mano. Pero wa ko’y panahon sa pagpakigsangka nimo’g dugay. Kinahanglang mamatay ka na aron mahanaw ka na sa hingpit sa akong dalan!

Ug milanog ang usa ka sipang buto. Pero wala ko maunsa. Nakita hinuon nako nga mingislo ang nawong ni Sheldon sa kasakit. -- Sumpayan pa