Kilometro 35

Gula 85

Gipunting dayon ni Sheldon ang armas nga iyang gigunitan ngadto kang Keith. Si Keith nagpabiling wala maglihok sa iyang gilingkoran.

“Patyon ko ikaw, Keith,” nagpaminti si Sheldon, “aron magbayad ka sa imong pagtraydor kanako!”

“Ikaw ang unang mamatay, Sheldon,” matud ko nga midali paggawas gikan sa akong gitagoan ug mibarog sa luyo ni Sheldon.

Gition ko kaniya ang gigunitan kong armas nga may silencer.

“Uy,” ni Sheldon pa nga milingi kanako. “Naa ka ra man diay diha, Sandra? Kumosta ka na? Nagkumboya na diay mo’g puwersa si Keith karon?”

“Miabot na gyud ang kataposan sa imong kadaotan! Pagabayran mo’g mahal ang imong pag-among-among nako ug sa imong pagpatay kang Orville.”

Apan si Sheldon kalma lang kaayo’g reaksiyon. Ingon sa wala siya malisang bisan nagtion na ako kaniya sa akong armas ug anytime mahimong kabliton ko kini aron siya mamatay ug mahingpit na ang akong panimalos. Nakahimo pa gani hinuon siya pagbugalbugal nako.

“Bravo!” Tuaw ni Sheldon dungan ang pagpakpak sa iyang mga kamot. “Maayo ka man diay nga modrama, Sandra. Pang-famas ang imong acting.”“

Makalagot para nako ang sinultihan ni Sheldon. Mora la’g wala niya hatagi’g gibug-aton ang kaseryoso sa akong gisulti. Apan wala ko magpaanod sa kapikal. Nasayod kong gusto lang ni Sheldon nga ma-demoralize ko aron malipat ko ug makahigayon siya pagpusil nako.

“Nalipay kong nakahukom ka sa pagpakigkita nako, Sandra,” nagkanayon si Sheldon. “Nakaseguro kong gihidlaw ug gimingaw ka sa akong romansa maong nakigkita ka gyud kanako dinhi ning mingaw nga dapit. Pero dili unta kini ang tukmang dapit alang nato. Mi-check in unta kadto kita sa usa ka hotel aron makapahimutang ta’g maayo.”

“Bastos!” Matud ko dayong kablit sa gatilyo sa akong armas. -- Sumpayan pa