Ning buntaga, napahunong si Mar sa iyang paglakaw. Nahiabot na siya sa nagkuros nga dalan sa siyudad. Sa tuong eskina ug sa walang eskina! Karon, naglibog siya asa sa duha ka dalan nga iyang subayon. Sa tuo o sa wala ba!
Nahalingi si Mar sa tuo nga dalan. Ang dangas niyang agtang ug upawon niyang ulo, misamot kasinaw nga natandangan sa buntagong bidlisiw sa adlaw. Ang tuo nga dalan maoy mohatod kaniya ngadto sa naandan niyang trabaho nga pagpangarga sa pantalan. Ang trabaho nga iyang gibuhi sa babaye nga bag-o niyang kaipon sa iyang barungbarong nga gipuy-an sa eskuwater. Si Grace, miabag kaniya sa pagpanglabada aron sila mabuhi.
"Sagdi lang, Grace! Magpakasal ta kun makatigom ko sa akong pagpangarga sa piyer...!"
"Ay na lang paghisgot og kasal, Mar! Nakasabot ra ko! Kanunay tang gipigis sa kawad-on...!"
"Morag dunay swerte nga taliabot, Grace! May hayahay nga trabaho nga gitanyag nako! Murag mao na ni ang makahaw-as nato sa kakabos....!"
Sa miaging adlaw, wa damhang gikakita ni Mar ang kanhi niyang klasmit sa elementarya nga si Henry. Hilabihan na nga desenteha niini. Gitanyagan si Mar og desenteng trabaho. Hayahay nga trabaho.
"Sus, nag-antos man ka sa imong pagka-kargador sa piyer, Bay Mar! Dalikyati ko’g duaw sa akong balay ug himuon tika nga delivery personnel sa akong negosyo...!" ni Henry nga misakay dayon sa iyang Honda Civic nga awto.
Gilingi ni Mar ang walang bahin nga dalan. Mao kini ang dalan nga mohatod kaniya sa pinuy-anay ni Henry. Nakahukom na siya ning buntaga. Moadto siya karon sa balay ni Henry. Dawaton niya ang gitanyag nga trabaho niini. Higayon na nga mahaw-as sila si Grace sa tumang kakabos sa eskuwater.
Mipadayugdog si Mar paglakaw. Sa unahan maoy nabantang sa iyang panan-aw ang matahom ug modernong pinintalan nga balay. Taas ang sementong koral niini nga mihaom gyud sa gisulti kaniya ni Henry. Apan nahibulong si Mar.
Daghang mga tawo ang nagtapok sa atubangan sa modernong balay. Adunay nag-parking nga tulo ka mobile patrol sa kapolisan. Miuliot si Mar sa nagtapok nga mga tawo. Nahasiga ang iyang mga mata dihang nakita niya si Henry nga pinosasan nga migawas sa gate sa balay, uban sa laing unom ka mga lalaki nga pinosasan. Giabayan ug gisundan sila sa mga polis nga midakop kanila. Ug klarong nadungog niya ang gipanagsultihan sa mga tawo nga nagtapok.
"Hay, sa kadugayan, nadakpan ra gyud si Henry sa kapolisan, ang usa ka big time pusher ug suplayer og shabu sa dakbayan, uban sa unom niya ka drug pusher. Hilabihan ka paspas ang iyang pag-asenso...!"
Nakapanguros si Mar sa hilom. Nakahangad siya sa Kahitas-an. Kalma ug hinay siyang mitalikod aron pagbalik sa iyang agi ning buntaga-balik sa naandan niyang dalan nga subayon matag adlaw. Ug nagkibotkibot ang baba ni Mar.
"Lord, salamat! Salamat gyud nga wa ko mahinayak dayon sa pagsubay sa dalan sa kadaotan...!" (Kataposan)