Gahong nga wa pay nakatugkad

Nagpabiling dalagang guwang si Repsalyang, gumikan sa pagkahimilion og lalaki nga iyang higugmaon.

"Maminyo pa kaha ako Nay Porlang?" Kausa nangutana si Repsalyang sa iyang inahan nga taudtaod na usab nga nabiyuda.

"Ambot kanimo anak? Sa sobra mong kahimilian, meresulta na hinuon nga nabiyaan ka sa tren!" daling tubag ni Nanay niya Porlang nga niadtong higayona nagkadusingot og sandok sa bag-ong naluto nga tinughong alang sa ilang pamahaw.

Dili ikalimod nga ning ilang dapit sa may balangay sa Sangi, maghuot ang mamisitahay sa balay nila ni Repsalyang. Way usa niya nga gipasalig, kay sa iyang tan-aw pulospulos man gayod og hitsura sa unggoy nga nakabuhi sa lasang.

Apan naunsa ba nga pagkahitaboa, nga sa kadaghan niyang maghahalad, kalit man lang mitungha sa ilang balay si Bartolo, aron mamisita na kaniya?

"Ulahi na ang tanan ... Bartolo, nga manguyab ka pa kanako? Tiguwang na god ko nga dalaga?" Iuhaan ang duha ka mata ni Repsalyang, nga inanay nanubod sa pagdaligdig sa iyang kunoton na nga aping.

"Nagpabilin ako nga ulitawong guwang, kay gihuwat ko ikaw kun kanus-a mopitik ang imong kasingkasing, aron imo akong higugmaon!" hapit na lang moluhod si Bartolo atubangan ni Repsalyang.

"Diay ba?" mubong tubag sa dalagang guwang.

Nagpakasal gayod ang duha sa may dako nilang simbahan ning ilang lungsod sa San Fernando. Pulos kahigwa-os ug kaluhag ang gibati nilang duha human sa ilang kasal.

Naglumpayat nga migakos sa kahugot si Bartolo ngadto kang Repsalyang. Pilit pa sa isdang kome ang ilang matag ka ngabil nga naghinagkanay.

Lakip si Nanay niya Porlang, nga naghigda sa may pikas nga sibay sa ilang gihigdaan, gisakitan na hinuon sa pus-on nga nagpaminaw sa talagsaong linagubo sa bag-ong magtiayon.

Taliwala sa nagbuy-od nga kahilom, mao na lamang ang nadunggan sa inahan ni Repsalyang ang inagulo sa iyang anak nga naminyo diin kini nagkanayon:

"Karon Bartolo natagamtaman ko na gayod ang katagbawan nga ikaw pa ang nakatugkad sa kahalawom sa akong gahonggggg!" (Kataposan)