Kilometro 35

Gula 78

Tsug! Tsug! Tsug! Tsug! Tsug! Tsug! Gipusil nako sa makadaghan si Karl gamit ang akong armas nga may silencer. Nahalimbaglimbag siya sulod sa sakyanan nga naigo sa akong pagpusil.

Giseguro gyud nako nga patay na siya sa wala pa ko mobiya sa iyang nahimutangan. Dili na ko gustong masubli pa ang sama sa nahitabo kang Lyle nga nakasulti pa ngadto kang Sheldon bahin kanako sa wala pa kini kabugtoi sa hingpit sa iyang gininhawa.

Human natino nga patay na si Karl, kalma kong milakaw palayo sa iyang nahimutangan. Wala na ako mobalik og sakay sa awto nga gimaneho ni Bredhart. Didto na ako mosakay sa getaway vehicle nga gimaneho ni Keith. Mibiya dayon mi sa maong dapit.

“Napatay mo ba gyud siya?” Gipangutana ko ni Keith samtang kusog nga nagdagan ang among gisakyan.

“Giseguro ko gyud ang iyang kamatayon,” maoy akong tubag. “Wa na ko mokompiyansa kay lisod na kaayo kun makabalos pa siya.”

“Nausab ka na gayod, Sandra. Mora’g dili na ikaw ang Sandra nga akong nailhan kaniadto.”

“Nganong nakasulti ka man og ingon niana?”

“Tungod kay nagbaton ka na’g igong kaisog. Kursonada kang mopatay. Ingon sa dili ko makatuo nga makahimo ka’g ingon niini.”

“Tig-a na ako’g balatian ngadto sa mga tawo nga nakasala kanako. Karon nga patay na si Karl, si Sheldon na ang sunod!”“

Pag-abot namo sa balay ni Fernan sa bukirang bahin sa siyudad sa Obic, gibalitaan dayon nako ang lider sa mga vigilante sa kalamposan sa among lakaw. Nalipay si Fernan sa akong gitaho kaniya.

Human sa among panagsulti, misulod ko sa akong lawak aron mopahulay. Apan imbes matulog, ingon sa naglutawlutaw ang akong hunahuna. Hangtod nga misantop sa akong kaisipan si Keith. -- Sumpayan pa