Wa ko ibulag ang akong panan-aw sa atbang, didto sa terrace sa among silingan. Malipayon si Yolanda uban kang Remo. Bisan gabii, klaro ko silang nakita nga nagsultihanay ug nagkuptanay sa kamot. Hayag sa suga sa elektrisidad ang ilang terasa.
Suod kong amiga si Yolanda kay gawas nga silingan kami, nagkauban sab kami sa kursong nursing nga among gikuha sa Velez College sa Ramos. For the first time human ko mosaad nga di na mahigugma pag-usab dihang giluiban ako sa akong hinigugma, nahigugma ako pag-usab. Apan si Yolanda ang nagustohan ni Remo. Di ikalimod nga managhigugmaay sila kay kanunay mamisita si Remo kang Yolanda ug kanunay sab silang manuroy.
Usa kadto ka higayon nga misuroy ko sa SM City, nagmeryenda ko sa fastfoods dihang giduol ko ni Yolanda. Gipaila-ila niya nako ang kauban niyang lalaki nga mao si Remo.
Sukad nga nagkaila kami si Remo, di na siya mahanaw sa akong hunahuna. Ug nasayod ako kun unsa ang hinungdan. Nahigugma ako kaniya. Wa matuman ang akong gipanumpa nga di na ako mahigugma pag-usab.
"Nganong miabot ka pa sa akong kinabuhi, Remo?" Hilom kong nakaingon sa akong kaugalingon.
Unya nakita ko si Yolanda nga miwara-wara sa iyang kamot nako, nagtan-aw sab si Remo nako. Ila diay kong nakita. Hayag sab ang terrace nga akong nahimutangan sa among balay. Pulos kami anak og dato si Yolanda, nagpuyo kami sa usa ka subdivision sa siyudad. Pulos mga adunahang negosyante ang among mga ginikanan.
Pagka ugma, nagkita kami si Yolanda sa Velez College. Malipayon kaayo siya. Gipakita ko nga malipayon sab ko, di ko gustong mamatikdan niya nga magul-anon ko ug si Remo ang hinungdan.
"Nangimbetar si Remo nato, Digna. Birthday niya ug gusto niya nga iselebrar kini sa beach resort sa Liloan. Kitang duha ra ang iyang giimbetar."
"K-Kamong duha na lang, Yol." Hapit ko isulti sa akong amiga nga makasamok lang ko nila ni Remo. Apan nakapugong ko sa akong kaugalingon.
"Di mahimo. Kinahanglang mokuyog ka."
Wa na koy nahimo. Mikuyog ko kanila ni Yolanda ug Remo sa beach resort sa Liloan pagka Sabado kay mao ang birthday ni Remo. Talagsa ra kong mosulti. Naniid ko kanila ni Yolanda ug Remo. Akong namatikdan nga kanunay motutok si Remo nako.
"Maligo na ko, ha! Dinhi lang mo."
Wa ko makatingog dihang nagdagan si Yolanda nga mipaingon sa dagat. Nag-short pants kaming tulo. Mitan-aw ko kang Remo. Parehas kaming nagyaka sa puting baybayon."
"I-I love you, Digna!"
Nakalitan ko sa gisulti ni Remo. Wa gyod ko magtuo nga mangulitawo siya nako.
"Ikaw ang nag-usab sa akong kinabuhi, Digna. Di na unta ko gustong mahigugma pag-usab human magpakasal sa laing lalaki ang babaye nga una kong trato. Apan tungod sa atong panagkaila, nahigugma ako pag-usab. Salamat kang Yolanda nga akong ig-agaw. Gipaila-ila ka niya nako."
"I-Ig-agaw nimo si Yolanda?" Nakugang ko sa akong nasayran.
"Oo, Digna. Kanunay kong moadto sa ila aron makita ko ikaw kanunay."
Gisulti ko kang Remo nga managsama kami’g kasinatian sa una namong gugma. Ug kay nahigugma ako kaniya, gidawat ko dayon ang iyang gugma. Malipayon kami sa pagpanglabay sa mga adlaw. (Kataposan)