Gula 77
Si Fernan maoy nagplano kun unsaon pagtipi si Karl. Apan wala na siya mokuyog sa operation. Nagpabilin lang siya sa balay. Si Bredhart maoy iyang gipa-drive sa awto nga akong gisakyan. Si Keith maoy gipamaneho sa getaway vehicle nga mao unya’y akong sakyan sa akong pagsibat.
Nasundan namo sila si Karl ug Sheldon nga nagkuyog sa pagpanugal sa casino. Gitun-an namo ang sitwasyon sulod sa sugalan. Among nasuta nga maglisod mi kun sa sulod sa casino nako tumbahon si Karl. Hugot kaayo ang seguridad sulod sa casino. Alerto kanunay ang mga security guard ingon man ang ubang house detectives nga nagpaniid sa palibot.
Migawas na lang mi sa casino. Mibalik mi si Bredhart sa nahimutangan sa among sakyanan. Mipailob mi sa paghulat nga mogawas sila si Sheldon ug Karl sa casino. Dili mi mopauli ngadto sa bukirang bahin sa siyudad sa Obic kun dili kami molampos sa pagluthang kang Karl.
Wala dangtig usa ka oras, nakita namo si Karl nga migawas sa casino nga nag-inusara. Mipaingon siya sa nahimutangan sa sakyanan nila ni Sheldon. Wala ko mag-usik og panahon. Mikanaog ko sa awto ug mipaingon sa iyang nahimutangan. Nag-amping kong dili siya makamatikod nako.
Dihang nakaabot na ko sa luyo sa sakyanan nga iyang nahimutangan, gihinay ko’g patuyhakaw ang akong ulo ug gilili ko siya didto sa sulod. Akong nakita nga nagbutang siya’g earpiece. Mora’g gipakusgan sab niya ang aircon. Pildero tingali ang kanahan maong nagparelaks-relaks lang una.
Milingilingi ko sa palibot. Human nasuta nga walay kuydawo, migawas ko gikan sa akong gipasalipdan. Nagpatungod ko sa pultahan sa sakyanan diin naglingkod si Karl sa sulod. Gituktok ko ang bildo sa bentana sa sakyanan. Naabli ang bentana. Ug naniga ang mga mata ni Karl sa iyang pagkakita kanako! Molanit unta tingali siya’g hinagiban apan ako siyang naunhan! -- Sumpayan pa