Sukli sa utang

Gula 237

Nabuhian nako ang botelyang may sulod nga bino gumikan sa kakalit sa pagbaswat ni Mar kanako. Nayabo ang sulod niini ngadto sa salog. Apan wala na namo kini panumbalinga. Nagkapuliki na ko’g panagang sa nagpungasing mga halok ni Mar.

Dihang napahigda nako sa kama, misugod dayon pagkiat ang mga kamot ni Mar. Gipanghinol niini ang sensitibong mga parte sa akong lawas aron pagtukbil sa akong gana.

Gitambayayongan namong duha ang pagbugtaw sa himayang lawasnon. Nagdungan mi’g abot sa finish line. Unya, daw nagpalabwanay mi sa among mga hangos sa kakutas human mahingpit ang pagkatkat sa ikapitong langit.

Dihang inanay nang mihunas ang kakutas, mibangon si Mar ug nag-ilis. Misunod sab ko pagbangon aron isul-ob ang akong mga sapot.

“Kanus-a ka mobalik dinhi?” Walay pag-ukon-ukon ang akong pagpangutana kang Mar samtang gisul-ob ko ang akong undies.

“Bisan tanang gabii kun gusto nimo moanhi ko,” nagkanayon si Mar.

“Sa Biyernes moadto ko sa Tagbilaran. Hain may maayo kun adto na lang ta mag-abot didto?”

“Uyon ko sa imong sugyot. Mas maayo didto kay way kuydawo.”

Human maserto ang sabot, migawas na si Mar sa balay. Lawom nang gabii. Mingaw na ang palibot. Apan wala gihapon mi mokompiyansa. Naniid una mi kun wala na ba gyu’y tawo nga nagtikawtikaw sa gawas sa wala pa nako pagawsa si Mar sa front door sa balay.

Gisirad-an nako ang pultahan dihang nakalakaw na si Mar. Mibalik ko’g sulod sa kuwarto. Igo lang kong nakahigda, nabati ko ang paghot sa iro didto sa unahan. Misantop sa akong hunahuna nga si Mar tingali ang gipaghot sa mga iro.

Pagka-Biyernes, nagkakita gyud mi si Mar didto sa Tagbilaran human nako’g kobra sa kuwartang gipadala ni Ferdinand pinaagi sa banko. Naniudto una ming daan. Pagkahuman, mi-check in dayon mi sa usa ka hotel. Nagplano mi nga inigkaugma na kami mo-check out.-- Sumpayan pa